Por E.P. | SANTIAGO DE COMPOSTELA | 08/04/2019 | Actualizada ás 09:20
A Consellería do Medio Rural permite de novo desde o este luns tramitar permisos para facer queimas, de acordo coa normativa de aplicación, xa que as condicións meteorolóxicas así o permiten.
Isto significa que o vindeiro mércores, 10 de abril, será o primeiro día no que se poderán realizar queimas previamente comunicadas. Deste xeito, desde as 00,00 horas --do domingo ao luns-- xa se poden realizar as comunicacións e solicitudes de autorización de queimas a través da web da Consellería do Medio Rural, de acordo co establecido no artigo 34 da Lei 3/2007, do 9 de abril, de prevención e defensa contra os incendios forestais de Galicia.
Ademais, en días laborais, tamén estará a disposición dos cidadáns o teléfono 012 para comunicar as queimas. Todos aqueles que desexen queimar restos agrícolas que se acumularon nas zonas que determina dita lei, nos períodos habilitados, deberán comunicalo dous días antes.
No caso das queimas de restos forestais, deberase solicitar unha autorización, xa que o proceso de tramitación é maior. En todo caso, a autorización e as comunicacións deixarán de ter validez nos días nos que hai vento e altas temperaturas. Pódese consultar máis información na dirección http://mediorural.xunta.gal/areas/forestal/queimas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.