Desconvocada a folga en Atención Primaria tras aceptar o Sergas todas as demandas dos traballadores

A Xunta acepta crear un Consello Técnico de Atención Primaria, no canto da mesa de diálogo.

Por Europa Press / Redacción | SANTIAGO DE COMPOSTELA | 08/04/2019 | Actualizada ás 16:12

Comparte esta noticia

O comité de folga de Atención Primaria, no que están representados a Coordinadora e seis centrais sindicais --UGT, CIG, CSIF, CESM, CC.OO. e O'Mega--, acordou desconvocar a folga dos días 9, 10 e 11 de abril ao "aceptar" o Servizo Galego de Saúde (Sergas) "todo" o reivindicado para frear a mobilización. Así o confirmaron fontes do comité de folga e do Sergas tras o encontro celebrado entre as 11,00 e as 15,30 horas con recesos polo medio.

Manifestación Vigo pola Atención Primaria.
Manifestación Vigo pola Atención Primaria.

En concreto, o Sergas aceptou crear un Consello Técnico de Atención Primaria, no canto da mesa de diálogo, na que estarán representadas unhas 40 persoas de sindicatos, sociedades científicas e profesionais, colexios médicos e outras entidades do ámbito sanitario galego, destacaron fontes do comité.

Os sindicatos valoraron que "se cumpre o obxectivo de abrir mesa de negociación" coa creación deste Consello "que perdura no tempo", feito que consideran "importante" porque permitirá "ir crecendo" ao modelo da Atención Primaria.

Tamén acordaron convocar mesa sectorial de sanidade o 26 de abril no que se "aprobará a orde para regular este Consello", abundaron. Pediron a convocatoria da primeira reunión deste novo órgano en maio. "Para nós é importante que recollan as funcións do Comité", apostilaron.

Outros aspectos aceptados polo Sergas, destacou o comité de folga, inclúen "definir as competencias" de Atención Primaria e Atención Hospitalaria e o "compromiso de dotar orzamentariamente todos os acordos". "Recoñecen a necesidade de que hai que mellorar as condicións de Atención Primaria", sentenciaron.

ACTA

Na acta de remate das negociacións celebradas para a resolución do conflito tras a convocatoria de folga neste nivel asistencial, o primeiro punto fixa a apertura na mesa sectorial "dun diálogo sobre Atención Primaria cara á negociación de todas as reivindicacións de contido laboral incluídas na convocatoria de folga presentada, significadamente a dotación de prazas".

O segundo punto sinala que en relación ás cuestións de carácter asistencial ou organizativas incluídas nas reivindicacións, "as mesmas serán canalizadas a través do Consello Técnico de Atención Primaria, órgano colexiado" no que, especifican, estarán representados, entre outros colectivos, as sociedades científicas, asociacións profesionais e sindicatos". Respecto diso, especifícase que este órgano será creado por orde da Consellería de Sanidade e cuxo borrador foi entregado ás organizacións sindicais convocantes para a formulación de alegacións.

O terceiro do seis puntos da acta recolle o compromiso das partes de alcanzar unha "solución inmediata" ao conflito existente nos Puntos de Atención Continuada (PAC).

O cuarto céntrase no "compromiso de mellora do modelo de nomeamento estatutario eventual de continuidade acordado na Mesa Sectorial". O quinto sinala que as medidas previstas neste acordo irán acompañadas "dun incremento do programa de gasto de Atención Primaria á saúde, en función das dispoñibilidades orzamentarias".

O sexto e último punto indica que durante o mes de abril, o día 26 segundo confirman os sindicatos, será convocada a Mesa Sectorial para a "análise dos aspectos referidos", así como para analizar as alegacións ao borrador da orde de creación do Consello Técnico de Atención Primaria, "que se constituirá na primeira quincena de maio co obxecto de aprobar a súa regulación de funcionamento interno", matizan.

Tras este seis puntos na acta asinada este luns polos sindicatos coa Administración, indican as centrais que "proceden á desconvocatoria da folga" convocada desde as 8,00 horas do día 9 de abril de 2019 ata as 8,00 horas do 12 no ámbito da Atención Primaria.

CONVOCATORIA DE PRAZAS

Por parte do Sergas, a directora xeral de Recursos Humanos, Margarita Prado, incidiu en que se trata dun acordo "positivo" froito do "diálogo aberto na Atención Primaria" a "iniciativa propia".

Neste sentido, Prado incidiu en que manifesta este acordo "o interese de todos pola mellora da Atención Primaria". A directora xeral reiterou que o acordado se centra por unha banda nos aspectos laborais, que serán abordados en Mesa Sectorial á volta de Semana Santa.

Mentres, o Consello Técnico de Atención Primaria reunirase "na primeira quincena de maio" para abordar as reivindicacións de carácter "organizativo". Sobre o aspecto orzamentario matizou que "primeiro hai que definir as medidas" e despois de "cuantificará" a partida.

Sobre a petición de convocatoria das prazas necesarias en Atención Primaria, a directora xeral explicou que centran "un dos temas do contido laboral" a tratar en Mesa Sectorial, na que, concretou, "se analizarán as categorías" con máis necesidades.

A Consellería de Sanidade, resalta que con este acordo "se culmina un proceso de diálogo pola mellora da Atención Primaria" no que participaron "máis de cen profesionais en máis de 50 reunións de traballo".

"Sanidade continúa apostando polo diálogo e o consenso ao obxecto de, entre todos, mellorar a Atención Primaria tal e como se ratifica de novo no plan con case 200 propostas realizadas", destaca a Consellería.

ÁREAS SANITARIAS

En concreto, ratifica que no documento de propostas para o novo modelo de Atención Primaria en Galicia "xa está incluído o compromiso de manter un orzamento específico para o programa de gasto, diferenciado dentro da clasificación funcional do organismo".

Outra das medidas, indica Sanidade, previstas "é a substitución das actuais estruturas organizativas de xestión integrada (EOXI) polas áreas sanitarias. "Están concibidas como estruturas organizativas que asumirán con autonomía funcional a xestión dos recursos sanitarios, prestacións e programas de atención sanitaria, así como a coordinación sociosanitaria e a promoción e protección da saúde da súa poboación de referencia", conclúe.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta