As Brigadas de Reforzo de Incendios Forestais cobrarán un 11% máis

O Ministerio de Facenda deu o visto e prace á aplicación das novas condicións laborais e económicas do colectivo das Brigadas de Reforzo de Incendios Forestais (BRIF), o que supón un incremento salarial de ao redor do 11%.

Segundo revelou CC.OO. de Construción e Servizos, a Secretaría de Estado de Facenda deu luz verde este xoves á aplicación das condicións pactadas desde o 1 de decembro de 2017, que serán finalmente publicadas no Boletín Oficial do Estado (BOE).

Este acordo contén unhas melloras nas condicións de traballo das BRIF, tales como un incremento salarial de arredor do 11% desde o momento no que se subscribiu o acordo en 2017 ou o recoñecemento da segunda actividade para os efectivos que non puidesen estar na primeira liña de extinción nos incendios forestais.

CC.OO. tamén destaca, entre outras medidas, que se conseguiu "unha reivindicación histórica" como é o recoñecemento da categoría de Bombeiro Forestal. Neste sentido, o sindicato insistirá en que se recoñeza o CNAE 8425 e CNO 5932, para que esta categoría teña a efectividade real "que se merecen os traballadores".

O sindicato celebrou "a maior predisposición" do Ministerio para buscar unha solución. "O éxito do colectivo das BRIF demostra que a unión e a organización sindical dos traballadores poden conseguir grandes melloras nas súas condicións laborais", destacou.