Por Europa Press / Redacción | SANTIAGO DE COMPOSTELA | 13/04/2019 | Actualizada ás 18:29
Compromiso por Galicia (CxG) ocupará o terceiro posto na lista de Coalición por unha Europa Solidaria (CEUS), organización que estará encabezada por Izaskun Bilbao, actual eurodeputada, mentres que no segundo posto irá o candidato de Coalición Canaria.
Así, Juan Carlos Piñeiro, actual secretario xeral de CxG, foi escollido nas primarias do partido para encabezar a lista dos galeguistas para as eleccións europeas de maio.
"Necesitamos estar na institución que máis inflúe realmente na economía e nos sectores produtivos galegos", asegurou CxG nun comunicado.
Neste sentido, Piñeiro destacou que CxG "vai cambiar a forma que ata agora tivo Galicia de influenciar en Europa" que, ao seu xuízo, "foi ningunha". "PP e PSOE nunca fixeron política galega en Bruxelas e as Mareas e o BNG non teñen ningunha fe no proxecto europeísta", lamentou.
Segundo indicou CxG, a organización política levou na pasada lexislatura máis de 80 iniciativas da sociedade galega a Bruxelas a través da súa eurodeputada Izaskun Bilbao.
"Traballaremos nunha candidatura espello da sociedade e cos pés na terra. Chamamos tamén á participación dos galegos do resto do estado porque poden optar por unha forza galeguista sen ideas constantes de independencia e con socios solventes", sentenciou CxG.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.