Por E.P. | SANTIAGO DE COMPOSTELA | 15/04/2019 | Actualizada ás 18:49
A Xunta de Galicia financiará o 80% da compra de dous locais das Sinas, en Vilanova de Arousa (Pontevedra), incautados no seu día aos Charlines e que serán destinados por parte do concello desta localidade a usos municipais, entre eles de carácter ambiental.
O vicepresidente da Xunta, Alfonso Rueda, visitou este luns estes dous locais en compañía do delegado da Xunta na provincia, José Manuel Cores Tourís, e da directora xeral de Administración Local, Marta Fernández-Tapias, para coñecer o seu estado e localización.
Ambos os baixos, de 600 e 262 metros cadrados, son propiedade da Axencia Tributaria, tras ser comisados por orde da Audiencia Nacional, que xa aprobou a oferta de compra do concello de Vilanova.
Segundo o convenio que anunciou este luns Alfonso Rueda, a Xunta achegará para a compra destes recintos o 80% do custo total, o que supón 87.100 euros, mentres que o concello custeará o 20% restante. Entre outros usos municipais, o principal destino ao que irán será para cuestións relacionadas co medio ambiente, albergando a Brigada Verde.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.