O BNG sinala o "empeño en esparcir o terror" do PP comparándoos con personaxes de Xogo de Tronos

A portavoz nacional do BNG, Ana Pontón, fixo un chamamento a votar con "esperanza" fronte ao PP, ao que compara cos "camiñantes brancos" da serie Xogo de Tronos --cuxa última tempada se estreou este luns--, "con ese empeño en esparcir o terror alí por onde pasan". Así se pronunciou nun mitin en Carballo (A Coruña), no que mostrou o seu "orgullo" polo traballo realizado neste municipio polo alcalde nacionalista, Evencio Ferrero.

Neste acto, Pontón proclamou que o BNG está en remontada e será decisivo nun Congreso sen maioría absoluta. "Cun BNG decisivo en Madrid imos tirar abaixo moitos muros", afirma en relación a cuestións como a AP-9, a tarifa eléctrica galega e a situación de empresas como Alcoa. Neste sentido, a portavoz nacionalista identifica unha "corrente de simpatía" a favor do Bloque de moitos galegos "decepcionados" coa discriminación das forzas estatais.

PIDE MENOS MINISTERIO DE FAMILIA E MÁIS POLÍTICAS CONTRA EMIGRACIÓN

Por iso, chama a "deixarse de franquías" como as que representa Feijóo en Galicia, ao seu xuízo, do PP de Pablo Casado. Afea ao líder dos populares que veña á Comunidade: "A dicirnos que a solución para o problema demográfico de Galicia é un Ministerio de Familia".

"A solución non pasa por unha proposta carca e rancia, fracasada e máis propia do século pasado, senón por frear a sangría da emigración e crear as condicións para que retornen os 150.00 mozos que colleron as maletas no dez anos do Goberno do PP".

Ana Pontón con candidatos do BNG | Fonte: Arquivo Galicia Confidencial