Vigo e A Coruña celebran o Día Lugrís
As dúas cidades con máis habitantes de Galicia acollerán o vindeiro sábado actos simultáneos en homenaxe ao pintor Lugrís.
Por Galicia Confidencial | A Coruña | 14/12/2011 | Actualizada ás 18:27
"Unha xornada cívico-bohemia". Así serán as accións que o 17 de decembro terán lugar en Vigo e A Coruña para homenaxear ao pintor Urbano Lugrís. Entre estas accións, "un único manifesto en botella polos camiños do mar a prol da creatividade e da arte galega", que terá lugar no Orzán e no Berbés.
Así, na Coruña comezará ás 20.00 horas en varias rúas da cidade un 'Obradoiro submarino', coa decoración de paraugas "lugrisianos" os Xardíns de Méndez Núñez; o 'Camarote Lugrís', na rúa Mantalería, cunha intervención pictórica-musical e unha 'Balada do Porto de os', unha performance musical no café Borrazás.
En Vigo, a xornada comezará ás 11.00 horas cun roteiro que comezará no Marco, dirixido por Carlos L. Bernárdez, e que percorrerá distintos puntos da cidade relacionados coa vida e a obra de Lugrís. Ás 19.00 horas no Verbum haberá unha charla sobre o pintor a cargo de Bernárdez e Antón Patiño e un recital de María Lado, Ledicia Costas e Lara Do Ar. Por outra banda, a Pinacoteca municipal exporá diversas obras do pintor.
"A Coruña e Vigo son a mesma cidade. Así nolo di co seu talento a pintura de Urbano Lugrís. Dous pontóns de amarre no mesmo océano", asegura un dos impulsores da iniciativa, Xurxo Souto
Deste xeito, Percalinópolys e Xouba City --en terminoloxías do propio autor--, estará unidas no recoñecemento ao talento de urbano Lugrís, "o profeta do atlántico", en palabras de Souto.
