“Provocar # Causar # Levantar ronchas ou comechón”, equivalentes, entre outras, á castelá “levantar ampollas”

En ocasións, ben de propio intento ou ben sen querer, dicimos ou facemos cousas que a outra xente non lle sentan moi ben e que lle provocan desgusto, desabor, desagrado ou desacougo... Mais se nos expresamos dun xeito metafórico, botando man da fraseoloxía, o que podemos causar son sensacións ou resultados coma as ronchas, a comechón ou o sarabullo. Vexámolo a seguir.

Levantar ampollas # ronchas

{= Ocasionar un dito ou un feito gran malestar, desgusto, desabor, desagrado ou desacougo.}

Provocar # Causar # Levantar ronchas && Provocar # Causar # Levantar comechón && Provocar # Causar # Levantar sarabullo

Ex.: Sus comentarios sobre la presunta corrupción política levantaron ampollas incluso dentro de su propio partido.

Os seus comentarios verbo da presunta corrupción política levantaron ronchas ‡ causaron comechón ‡ provocaron sarabullo mesmo dentro do seu propio partido.

● Tamén:

Levantar # Provocar # Causar espullas && Levantar # Provocar # Causar bochas && Levantar # Provocar # Causar ampolas

NOTAS:

1. Velaquí un sucinto repaso léxico a voces que poden resultar descoñecidas ou dubidosas para algúns lectores (naqueles casos en que tiramos literalmente a definición do Dicionario da Real Academia Galega [DRAG] en liña, sinalámolo):

Roncha (DRAG): substantivo feminino Pequena erupción cutánea branca ou avermellada, producida pola picadura dun insecto, por unha enfermidade etc., que xeralmente causa proído. Saíume unha roncha onde me picou o tabán. Sinóns.: aldroga, broulla. Cando tivo o xarampón, enchéuselle a cara de ronchas. Sinóns.: aldroga, broulla, gran.

Comechón (DRAG): substantivo feminino Pedra da parte superior da boca do forno, en forma de viseira. Tiña comechón nos pés a causa das frieiras. Sinóns.: coceira, comechume, comichón, comicio, rañeira.

Sarabullo (DRAG): substantivo masculino Erupción cutánea de grans e ronchas, xeralmente leve e pasaxeira. Un alimento en mal estado causoume o sarabullo. Sinón.: sarabullazo. [CORRESPÓNDESE CO CASTELÁN SARPULLIDO.]

Espulla (DRAG): substantivo feminino Vulto moi pequeno e benigno que se forma na pel. Unha bruxa cunha espulla no nariz. Sinóns.: burra, espunlla, verruga.

Bocha (DRAG): substantivo feminino Lesión cutánea producida por un levantamento da epiderme, a consecuencia dunha queimadura, un rozamento etc., e que inicialmente contén un líquido seroso. Queimouse cunha viradeira e saíronlle bochas. Sinóns.: ampola, bóchega, bóldrega, boza, flictena, vexiga, vincha, vinchoca.

Ampola (DRAG): substantivo feminino 1. Lesión cutánea producida por un levantamento da epiderme, que contén un líquido seroso. Os zapatos fixéronlle ampolas. Sinóns.: bocha, bóchega, bóldrega, boza, flictena, vexiga, vincha, vinchoca. 2. Pequeno recipiente de vidro ou plástico, hermeticamente pechado, que contén unha dose de determinadas substancias líquidas. Inxeccións en ampolas. Unha ampola de perfume. Unha ampola para o tratamento da caspa. 3. Burbulla de aire ou de gas que se forma nun líquido ou que aparece nunha materia sólida formando unha elevación. O máis característico do vaso eran as ampolas que se podían apreciar na base.

2. As expresións galegas están recolleitas das seguintes fontes:

- Recolleita propia da oralidade galega.

- Recolleita propia documental (artigos de prensa, artigos ou comentarios na Rede, obras escritas, folletos publicitarios, etc.).