En Marea estima "xusta" a suspensión do debate mentres pide reconsiderar a súa "exclusión" dos medios públicos
Luis Villares reclamou á JEC que reconsidere a decisión de outorgar a En Común Unidas Podemos os dereitos como 'herdeira' da En Marea de 2016.
Por E.P. | SANTIAGO DE COMPOSTELA | 16/04/2019 | Actualizada ás 20:36
O portavoz de En Marea, Luís Villares, cualificou de "xusta" a decisión adoptada pola Xunta Electoral Central (JEC) de reclamar cambios a Atresmedia para o debate electoral previsto para a próxima semana ao considerar que o seu deseño actual é contrario ao principio de proporcionalidade porque a presenza de Vox non está xustificada e debe mellorarse a compensación ás formacións excluídas.
"Consideramos que esa exclusión é xusta porque non hai un testeo electoral do que é Vox e, en cambio, si hai un testeo electoral do que é En Marea. Nestes momentos somos a segunda forza parlamentaria en Galicia e fomos excluídos dos espazos públicos", subliñou Villares a preguntas dos medios antes de participar nun acto este martes en Santiago.
Por iso, o ex-maxistrado lucense reclamou á JEC que reconsidere a decisión de outorgar a En Común Unidas Podemos os dereitos como 'herdeira' da En Marea de 2016, o que implica que a coalición de Podemos e Esquerda Unida goza dos espazos electorais nos medios públicos galegos da terceira forza en Galicia, en virtude dos resultados das últimas xerais.
Ademais, o fallo da JEC tamén implica a consideración de En Marea partido como unha forza política que nunca se presentou ás eleccións, polo que tivo que reunir os avais necesarios para concorrer aos comicios por cada circunscrición provincial.
