Cinco ONG asinan un manifesto por unha opción 100% vexetal nos menús dos comedores escolares galegos

Piden á conselleira de Educación, Carmen Pomar, "que atenda a demanda dunha porcentaxe crecente da cidadanía".

Por Europa Press / Redacción | SANTIAGO DE COMPOSTELA | 20/04/2019 | Actualizada ás 13:54

Comparte esta noticia

Cinco entidades sen ánimo de lucro subscribiron un manifesto en defensa dunha opción 100% vexetal nos menús que ofrecen os comedores escolares públicos en Galicia, pedindo á conselleira de Educación, Carmen Pomar, "que atenda a demanda dunha porcentaxe crecente da cidadanía".

Comedor escolar
Comedor escolar | Fonte: EP.

A Asociación Animalista Libera, a Fundación Franz Weber (FFW), ProVeg International, Liberánima e a Associaçao Vexetariana Portuguesa asinaron unha carta dirixida á titular de Educación, tras meses de contactos coa Administración para "calibrar" o nivel de interese "nunha medida que está establecida en países como Portugal e Chile e que se facilita en estados como Francia e Reino Unido cando unha familia demanda un menú sen produtos de orixe animal".

O manifesto sinala que "o pulo da reivindicación dos dereitos para os animais (...), o crecente compromiso por desenvolver unha vida con menor impacto sobre o medio natural e a biodiversidade (...) son feitos que ningún poder público nin a Administración gobernamental poden obviar (...) requirindo respostas adecuadas".

"Unha recente enquisa da consultora Lantern sinalaba que polo menos un 9,9% da poboación maior de idade en España se alimenta fundamentalmente con produtos de orixe vexetal, onde unha de cada dez mulleres do país se declara vexetariana", explica a carta, segundo recollen Libera e a Fundación Franz Weber, quen engaden que "isto evidencia que os cambios alimentarios aumentan e refórzanse por esta parte".

Os animalistas e ambientalistas reclaman desta maneira que as empresas concesionarias ou os comedores de xestión directa poidan elaborar un menú "nutricionalmente equilibrado" pero excluíndo alimentos de orixe animal, como a carne.

Neste sentido, Libera e FFW recorreron ao Defensor do Pobo, "do que esperan unha resposta positiva que desmonte a rixidez coa que a Xunta deu resposta ás primeiras peticións", alegando que "non existe unha lei que obrigue a prestar unha igualdade de dereitos no acceso á alimentación en centros educativos" seguindo os criterios que si se aplican, por exemplo, en Euskadi co seu menú escolar vexetal.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta