José Manuel Rey incorpórase ao seu posto como novo director do Museo de Pontevedra
Carmela Silva destaca a importancia do museo e asegura que "lle esperan moitas primaveras, veráns, outonos e invernos marabillosos". Rey afirma incorporarse ao posto con "unha ilusión moi grande".
Por E.P. | SANTIAGO DE COMPOSTELA | 22/04/2019 | Actualizada ás 13:41
A presidenta da Deputación de Pontevedra, Carmela Silva, recibiu este luns ao novo director do Museo Provincial, o arqueólogo e ata agora director do Parque Arqueolóxico da Arte Rupestre de Campo Lameiro, José Manuel Rey García, que este luns se incorporou ao seu posto. Carmela Silva destacou que o de Pontevedra é un dos museos máis importantes "do conxunto do Estado español", xa que é "unha institución que contén toda a nosa historia", pero a pesar de ser "coñecido a nivel internacional" fai falta "darlle un impulso máis potente aínda".
"Témolo que centrar no século XXI sen deixar de mirar para o pasado", manifestou a presidenta da institución provincial e, neste sentido, Silva considera que o nomeamento do novo director "é unha garantía de que lle esperan moitas primaveras, veráns, outonos e invernos marabillosos", para o que lle transmitiu "todo" o seu "apoio". Pola súa banda, Rey García dixo entender a responsabilidade que asume "cunha ilusión moi grande" por "tentar facer do Museo unha institución moito máis grande do que aínda é" e a idea de "apostar na mesma liña pola que están a apostar os principais referentes neste momento en país".
Respecto diso, citou a calidade, innovación, emocións, experiencias e "converter tamén ao Museo nunha factoría de coñecemento". Os seus primeiros pasos como director serán para coñecer "profundamente", dixo, a situación desta institución, as liñas de traballo que están xa consolidadas "e a partir desa reflexión sosegada e tranquila, empezar a planificar o futuro inmediato", apuntou.
Tamén avanzou que traballará "con esa idea de reforzar a participación, fomentar o diálogo e o debate crítico, de apostar por unha inclusión social na que todos se vexan reflectidos" e preocuparse por tratar de captar a ese público que non visita o museo "para tratar de ofrecerlle algo que nos demanden".
ACCESIBILIDADE
Por último, José Manuel Rey García sinalou que outro dos seus obxectivos é tamén a accesibilidade cognitiva e sensorial, para "que todo o mundo poida visitar o Museo en condicións de igualdade".
"Unha vontade por traspasar as nosas fronteiras, pola crenza nas sinerxías, na colaboración institucional, na cooperación, participando en redes de intercambio de experiencias", concluíu.
