Por Europa Press / Redacción | Santiago de Compostela | 25/04/2019 | Actualizada ás 11:28
Os fogares galegos nos que todos os seus membros activos están en paro aumentaron en 800 unidades no primeiro trimestre do ano en Galicia respecto ao anterior, de modo que alcanzaron un total de 55.000, segundo os datos da enquisa de poboación activa (EPA) que publica este xoves o Instituto Galego de Estatística (IGE).
En relación co mesmo período do ano pasado (primeiro trimestre de 2018), os fogares galegos con todos os seus membros en paro baixaron un 20,2%, o que supuxo que haxa 13.900 unidades menos.
Pola súa banda, o número de fogares nos que todos os seus membros activos son ocupados diminuíu en 2.900, ata 601.600. En taxa anual, son 21.800 fogares máis nesta situación, un 3,8% máis.
MOZOS
En canto aos mozos, dos 317.600 galegos de entre 16 e 29 anos, 114.600 (o 36,1%) están ocupados, 34.300 (o 10,8%) parados e os 168.700 restantes (o 53,1%) inactivos.
A taxa de ocupación deste colectivo sitúase no 36,1% no primeiro trimestre de 2019, de modo que descende 2,4 puntos respecto ao trimestre anterior e 0,1 puntos en relación co primeiro de 2018.
Mentres, a taxa de paro xuvenil sitúase no 23,1%, 1,6 puntos por enriba da do trimestre anterior. En comparación co primeiro trimestre de 2018, baixou 2,7 puntos.
O 71,4% dos ocupados comprendidos entre estas idades traballa a xornada completa, de forma que a cifra se reduce un 8,9% respecto ao cuarto trimestre de 2018. Pola contra, os mozos ocupados a xornada parcial aumentan en 300 persoas.
Se a comparativa establécese co primeiro trimestre de 2018, a ocupación xuvenil a xornada parcial aumenta (en 1.000 persoas) e baixa a xornada completa (en 2.000).
CASE 60% DE TEMPORALIDADE
Dos 104.700 asalariados existentes neste trimestre de entre 16 e 29 anos, o 40,5% está vinculado á empresa por medio dun contrato indefinido.
O número de mozos con contrato indefinido diminuíu un 11,5% respecto ao trimestre anterior e aumentou un 7,9% respecto ao mesmo período de 2018.
O total de novos asalariados con contrato temporal diminuíu un 4% respecto ao trimestre pasado e un 3,6% en relación co primeiro trimestre de 2018. A taxa de temporalidade para este colectivo sitúase así no 59,5%.
ASALARIADOS, TEMPORALIDADE DO 25,8%
En total, en Galicia había 865.100 persoas asalariadas no primeiro trimestre de 2019, 641.500 con contrato indefinido e os 223.600 restantes con contrato temporal.
Con respecto ao trimestre anterior rexístranse 5.000 asalariados menos con contrato indefinido, o que supón unha diminución de 0,8 puntos en termos relativos. As persoas suxeitas a un contrato temporal diminuíron en 3.200 (unha baixada do 1,4% con respecto ao cuarto trimestre de 2018).
En variación interanual, as persoas con contrato indefinido incrementáronse un 5,2% e as persoas con contrato temporal aumentaron un 0,9%.
A taxa de temporalidade, calculada como a porcentaxe de persoas con contrato temporal sobre o total de asalariados, sitúase en global no 25,8%.
GRANDES CONCELLOS
Das sete grandes municipios galegos, o IGE observa que Lugo e Santiago son os que presentaron as maiores taxas de ocupación (53,9% e 58,1%, respectivamente) no primeiro trimestre de 2019. Ferrol é o concello coa menor taxa de ocupación (45%).
No referido ás taxas de paro, este trimestre Santiago é o concello de entre o sete con menor valor (5,2%) e Pontevedra o que presenta a taxa de paro máis elevada (17,3%).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.