O pai de Diana Quer tenta condicionar a campaña electoral con acusacións a PSOE e Podemos e eloxios a PP e Ciudadanos

O pai de Diana Quer, Juan Carlos Quer, denunciou este xoves 25 de abril que o presidente do Goberno e candidato do PSOE, Pedro Sánchez, e o secretario xeral e candidato de Unidas Podemos, Pablo Iglesias, "ignoran" a iniciativa cidadá rexistrada no Congreso dos Deputados para a non derrogación da prisión permanente revisable, apoiada por 3,2 millóns de persoas.

"Fronte á sensibilidade mostrada polo Partido Popular e Ciudadanos sorprende a actitude adoptada polo PSOE e Unida Podemos, que pretenden ignorar este clamor popular. O señor Sánchez rexeitou o encontro alegando na súa carta de contestación problemas de axenda e o señor Iglesias deu a calada por resposta", sostén o pai de Diana Quer nun comunicado.

Así mesmo, lembra que a súa filla Diana dixo "non é non" e foi "brutalmente asasinada por un salvaxe", que, tras violala, depositou o seu corpo durante 500 días nun pozo. "Ocorreulle á miña filla, pero é responsabilidade de todos os partidos políticos, tamén do PSOE e Unidas Podemos, evitar que este tipo de traxedias se repitan", asevera, para engadir que os pais de menores e novos asasinados non queren escoitar máis condolencias por violacións e mortes que "poden evitarse".

Tamén apela ao artigo 14 da Constitución --dereito de todos á vida e á integridade moral-- para dicir que isto se garante coa prisión permanente revisable que quere derrogar.

"Os cidadáns españois que non imos en coches oficiais nin temos escolta, estamos en contra de que PSOE e Unidas Podemos tenten derrogar a pena de prisión permanente revisable. Pola seguridade e a protección dos nosos fillos, da muller. Así llo faremos saber co noso voto nas urnas o próximo día 28 de abril", di.