O vicepresidente da Xunta irá á manifestación de ENCE convocada o último día de campaña electoral
Alfonso Rueda irá con outros membros do PP de Pontevedra tal e como anunciou o candidato popular á alcaldía da cidade Rafa Domínguez.
Por E.P. | SANTIAGO DE COMPOSTELA | 25/04/2019 | Actualizada ás 18:08
O presidente provincial do Partido Popular, Alfonso Rueda, participará xunto a outros membros do seu partido na manifestación, convocada este venres polos traballadores de ENCE, en defensa da continuidade da fábrica na ría de Pontevedra.
Así o anunciou este xoves o candidato popular á Alcaldía de Pontevedra, Rafa Domínguez, que compareceu en rolda de prensa para valorar os datos publicados sobre a primeira EPA de 2019. "Confírmase que o principal problema do noso municipio é o desemprego e Lores é o campión do paro", ironizou, para advertir de que estas cifras aínda "non contemplan" as consecuencias derivadas do posible peche de Ence, que serán "catastróficos".
"800 familias que van á rúa e está en perigo a estabilidade económica da nosa cidade. Non hai futuro", destacou o candidato popular. Neste sentido, Rafa Domínguez lembrou que os traballadores de Ence están a mobilizarse para defender os seus postos de traballo e lamenta que "non se lles reciba" nin o Concello nin o presidente do Goberno porque "o mínimo que merecen é diálogo e comprensión".
