Pontón diríxese ao alcalde de Santiago: "Podemos axudar, o mellor para Galicia é BNG"
A portavoz nacional do Bloque fixo tamén un chamamento ás persoas indecisas e que poden ser convencidas pola "campaña do medo" para que voten a "frear a ultradereita".
Por E.P. | SANTIAGO DE COMPOSTELA | 25/04/2019 | Actualizada ás 21:46
A portavoz nacional do BNG, Ana Pontón, fixo unha apelación a todos aqueles que están "a dubidar" e aos que lles poida convencer a "campaña do medo" e, así, advertiu de que "a mellor maneira de contribuír a frear a ultradereita" é a formación nacionalista. E tivo unha mención especial na capital galega para dirixirse aos "alcaldes do cambio", que "non cambiaron nada". Entre eles atópase o compostelán, Martiño Noriega, que outrora militou no BNG e que tras a crise de En Marea e a non participación da súa actual formación, Anova, nas eleccións xerais, está entre os "indecisos".
Tras ironizar con que "vai ser verdade" a enquisa do CIS sobre as persoas que non teñen decidido o seu voto, dirixiuse a eles: "Podemos axudalos, o mellor para Galicia é votar BNG". Pero Ana Pontón, que volveu a apelar ao voto das mulleres e ao voto "feminista" como única fórmula para "frear" á "ultradereita", tamén tivo palabras para o acto de "turismo electoral" do día, como así denomina ao paso de líderes das forzas estatais por Galicia.
Nesta ocasión foi a quenda do candidato de Unidas Podemos, Pablo Iglesias, o "turista do día". Citou as súas declaracións nas que dixo que "España tiña que negociar mellor as cotas" pesqueiras para advertirlle de que "o problema" de Galicia é "que "deciden por ela". "Galicia é a que ten que negociar as cotas", replicoulle.
Aínda que comezou por el, tamén censurou o paso do socialista Pedro Sánchez, a quen afeou que só pedise o voto aos galegos tras pretender aprobar os orzamentos "máis baixos" en 17 anos para Galicia. E tivo palabras para o popular Pablo Casado, de quen cuestionou que prometese un ministerio "que xa había co franquismo", o da Familia, ou apelase ás vítimas de ETA durante unha comida electoral na capital galega.
25 DE ABRIL
Así transcorreu o penúltimo mitin desta carreira electoral cun marcado ton reivindicativo, coincidindo co 45 aniversario da Revolución que puxo fin á ditadura salazarista en Portugal, que cobrou protagonismo nada máis arrincar o acto coa interpretación deste himno revolucionario e pacífico en que o auditorio, cunhas 400 persoas, cantou os versos de Zeca Afonso caravel en man.
No acto tamén interviñeron a cabeza de lista pola Coruña, Néstor Rego, e o tamén membro da candidatura Suso de Toro. Como tamén fixo Ana Pontón e a aspirante á Alcaldía de Santiago, Goretti Sanmartín, tiveron palabras para enarborar a figura de Rosalía e citar versos do poeta galega. É máis, Rego comprometeuse a ler á "patriota, rebelde e feminista" ao chegar ao Congreso, unha viaxe a Madrid que deu por feito Goretti Sanmartín. Ambos protagonizaron a foto anecdótica da tarde noite deste xoves, ao entregarlle ela unha maleta de cor morada, segura de que o domingo pola noite faralle falta.
"ÍMOLO CONSEGUIR"
Convencido de que se logrará representación en Madrid tamén se mostrou Néstor Rego. "Tede a seguridade de que o imos conseguir!", proclamou o aspirante nacionalista, quen se referiu a os debates electorais desta semana para asegurar que quen "gañou" foi lle BNG "e iso sen participar": "Non hai maneira de garantir os intereses de Galicia é o BNG, que só ten unha lealdade con este país".
Rego apelou aos todos os que votasen " o que votasen no pasado" e que "neste contexto confíen en Galicia e no BNG": "Temos que acabar coa afonía política do país, non é un custo que pague o BNG, senón todos os galegos". Tamén interveu Suso de Toro, que, como el mesmo lembrou, se acaba de "incorporar" ao BNG, formación da que dixo que tiña "defectos", pero "nunca falla". Así, censurou a quen prometeu grupo parlamentario na anterior lexislatura, por En Marea, e "enganou" a todos os galegos.
Así, reivindicou que "o BNG se mantivo cando outros nos enganaron": "O BNG non mente nin defrauda, fronte a outros restos de naufraxio". É máis, asegurou que aínda que o Bloque non conseguise representación o vindeiro domingo, "vai continuar, porque é o mellor froito do país, a resistencia e é a única (forza política) imprescindible". Neste mes de "revolucións", en palabras de Goretti Sanmartín, a candidata á Alcaldía censurou que a xunta electoral prohibise a celebración dunha homenaxe aos Mártires de Carral na xornada de reflexión.
