O 061 replica á CIG que o novo concurso de ambulancias "creará novos postos de traballo"

O 061 replicou ás críticas da CIG sobre o novo concurso de ambulancias e asegura que este "creará novos postos de traballo para a atención ás urxencias e emerxencias extrahospitalarias e interhospitalarias na comunidade nas especialidades de médicos, enfermeiros e técnicos en transporte sanitario urxente".

Pola súa banda, o sindicalista da central nacionalista Xabier Aboi denunciou que as bases "non van resolver a situación de colapso que se produce nas principais cidades da comarca de Pontevedra e do Salnés".

Respecto diso, no caso de Pontevedra, o 061 asegura que "se aumentan os recursos da rede de transporte sanitario urxente", cunha nova ambulancia de soporte vital avanzado medicalizada con base na comarca do Salnés e con outra de soporte vital avanzado de enfermaría con base na cidade de Pontevedra.

Engade que "segundo mostran os últimos estudos realizados" na comarca do Salnés e na cidade de Pontevedra a cobertura sanitaria da atención ás urxencias e emerxencias extrahospitalarias atópase "garantida cos recursos asistenciais que Urxencias Sanitarias de Galicia-061 vén mantendo ata a actualidade".

"Todos os recursos contemplados no novo contrato cumpren coas esixencias do decreto nacional e o autonómico", segundo conclúen as fontes do 061.