Por E.P. | SANTIAGO DE COMPOSTELA | 08/05/2019 | Actualizada ás 16:21
A Policía Nacional detivo a dez persoas, sete delas en Galicia, no marco da denominada 'Operación Arco', por suposto branqueo de capitais contra a organización do narcotraficante galego Juan Carlos Fernández Cores, coñecido como 'O Parido'.
Segundo confirmaron fontes próximas á investigación, o operativo está dirixido pola Audiencia Nacional e levouse a cabo en localidades de Galicia e Portugal. Os axentes realizaron rexistros nas localidades galegas de Lugo, Pontevedra, Vigo, Nigrán, Cambados, Sanxenxo e A Cañiza, así como noutras de Portugal.
No marco do operativo, desenvolvido por axentes de Madrid da Unidade de Delincuencia Especializada e Violenta (UDEV) e da Unidade de Drogas e Crime Organizado (Udyco) en varias localidades, ademais das detencións, foi incautada diversa documentación, bens inmobles e dúas armas, concretaron as mesmas fontes.
SEGREDO DE SUMARIO
Preguntado sobre esta operación con motivo da súa presenza nun acto da Garda Civil en Brión (A Coruña), o delegado do Goberno en Galicia, Javier Losada, explicou que a 'Operación Arco' atópase "baixo segredo de sumario".
"Só lles podo adiantar que hai sete detidos en Galicia e que segue aberta", sinalou Losada, que indicou que os detidos en Galicia "poranse dentro dunhas horas a disposición xudicial". De feito, polo menos tres dos arrestados permaneceron detidos na Comisaría de Pontevedra á espera de ser trasladados á Audiencia Nacional.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.