A Xunta fortalecerá a marca España Verde

A directora de Turismo de Galicia, Nava Castro, participou este xoves no encontro da España Verde celebrado en Áraba, onde destacou a aposta de Galicia por reforzar o posicionamento internacional desta marca.

Coincidindo co 30 aniversario da España Verde e baixo a coordinación que este ano asume o País Vasco, o encontro serviu para facer balance das actividades realizadas ata agora e avanzar na programación deste 2019.

Neste sentido, Nava Castro destacou a oportunidade que suporá para as catro comunidades (Galicia, País Vasco, Asturias e Cantabria) poder reforzar o posicionamento internacional da marca turística do norte peninsular, despois de que a España Verde participase con éxito nunhas xornadas de promoción e comercialización organizadas por Turespaña en China.

Agora, preténdese intensificar ese esforzo mediante unha serie de accións encamiñadas a captar novos mercados de interese estratéxico, especialmente o asiático, e centrarse nos recursos que unen as catro comunidades, entre os que destaca o Camiño de Santiago, o patrimonio e a cultura, así como a enogastronomía.

O encontro celebrado este xoves incluíu un percorrido por algunha das adegas con máis historia do País Vasco, con visita guiada polos seus viñedos. Ao amparo desta actividade, tamén se falou da oportunidade que supoñen estes recursos para a España Verde, destacando a aposta de comunidades como Galicia por desenvolver un modelo turístico que impulsa os seus recursos culinarios e o traballo dos profesionais a través de Galicia Sabe.