Espectáculo exclusivo de Mercedes Peón polo décimo aniversario de Hércules como patrimonio da humanidade
O obxectivo é facer un discurso musical e artístico sobre o faro, a súa historia e a súa lenda.
Por Europa Press / Redacción | SANTIAGO DE COMPOSTELA | 11/05/2019 | Actualizada ás 15:18
Mercedes Peón ofrecerá o próximo 29 de xuño un espectáculo musical exclusivo polo décimo aniversario da Torre de Hércules como patrimonio da humanidade.
Baixo o nome 'Achégate a min', a artista galega dará un concerto gratuíto na contorna da torre, deseñado pola instrumentista especialmente para esta data. A idea, segundo a concellaría de cultura da Coruña, que organiza o evento, é facer un discurso musical e artístico sobre o faro, a súa historia e a súa lenda.
Empezará ás 23,30 horas e pretende achegar o carácter universal e emblemático do monumento nunha velada musical cunha escenografía "única e diferente". Peón pretende aplicar os esquemas creativos do seu último traballo discográfico, 'Deixaas', realizado con Mónica de Nut e Ana Fernández, á contorna natural de Hércules.
