Este é o mapa das enfermidades dos cefalópodos de todo o mundo

O CSIC, en colaboración con Anfaco-Cecopesca e a Consellería do Mar, publicou un atlas chamado 'Handbook of Pathogens and Diseases in Cephalopods' que recolle información sobre como recoñecer e tratar enfermidades e patóxenos nos cefalópodos en todo o mundo.

Na presentación do libro, celebrada este mércores na sede do CSIC en Santiago, estiveron presentes o investigador do Instituto de Investigacións Mariñas (IMM) do CSIC e editor do atlas, Anxo Guerra; o delegado institucional do CSIC en Galicia, Antonio De Ron Pedreira; o secretario xeral de Anfaco-Cecopesca e editor da publicación, Juan Manuel Vieites; a tamén editora, Camino Gestal; así como a conselleira do Mar, Rosa Quintana.

"Este atlas escribiuse porque, desde 1990, as investigacións sobre este tema foran bastante dispersas e estaban escritas en idiomas moi diferentes", explicou Guerra, que precisou que a publicación, a cargo da editorial Springers, conta con cinco editores: Anxo Guerra, Camino Gestal, Juan Manuel Vieites, Graciano Fiorito e Santiago Pascual.

O inicio deste proxecto, tal e como explicou o representante dos editores do libro, permitírono Camino Gestal e Graciano Fiorito, dous dos editores, cando "traballaron nun proxecto do 2014 ao 2017 da Unión Europea sobre o benestar animal". "Ambos xestaron a idea e, no Instituto de Investigacións Mariñas do CSIC en Vigo, un grupo de investigadores puxéronse a redactar un índice e a contactar con ata 40 especialistas de 12 nacións de tres continentes distintos", revelou Guerra ao explicar este proceso.

Para mellorar a comprensión de calquera tipo de lector, segundo apuntou Guerra, "contén dous capítulos dedicados a que as persoas que abran un cefalópodo por primeira vez saiban onde está cada órgano e como é na súa versión sa". Do mesmo xeito, Anxo Guerra explicou que esta publicación se dirixe ás industrias conserveiras e pesqueiras, así como tamén "pode ser útil" para os veterinarios e para os organismos autonómicos e estatais encargados da xestión sanitaria dos organismos.

Así mesmo, a colaboración con Anfaco-Cecopesca chegou por mor da necesidade dunha edición dixital do atlas, algo para o que o CSIC non tiña medios en por si. E foi precisamente desde Anfaco desde onde se contactou coa Consellería do Mar da Xunta para crear "unha simbiose".

MÁIS DE 4.000 TONELADAS VENDIDAS EN 2018

A conselleira Rosa Quintana, pola súa banda, valorou esta colaboración público-privada e aproveitou para lembrar que, en Galicia, o ano 2018 "pechouse con 4.400 toneladas de cefalópodos vendidos nas lonxas, o que supón unha facturación de case 30 millóns de euros".

Por último, Camino Gestal realizou unha breve intervención para explicar a relación entre a publicación deste libro e un posible avance na investigación que se están desenvolvendo en Vigo sobre o cultivo do polbo: "Nos cefalópodos, é moi importante saber o efecto de posibles patóxenos que poden estragar ou, directamente, matar o cultivo".

"Este é un primeiro manual que permite identificar e saber como atallar o problema tanto nun cultivo como nunha pesqueira", aclarou Gestal, quen tamén aclarou que salvo no caso do anisakis, "os parasitos non supoñen un risco se son consumidos polos humanos".