Moitos sinistros laborais mortais en Galicia en 2018 estiveron relacionados con infartos e accidentes de tráfico
Segundo o Instituto Galego de Seguridade e Saúde Laboral (ISSGA), o pasado ano producíronse 30.972 accidentes de traballo con baixa en Galicia e ata o 21% foron sufridos por persoas con menos de tres meses de antigüidade no seu posto de emprego.
Por E.P. | SANTIAGO DE COMPOSTELA | 23/05/2019 | Actualizada ás 14:11
Case a metade dos accidentes laborais mortais en Galicia durante o pasado ano foron debidos a accidentes de tráfico, derrames cerebrais, infartos e outras patoloxías "non traumáticas", segundo sinalou a diectora xeral de Emprego, Covadonga Toca, no transcurso da Comisión de Economía celebrada no Parlamento de Galicia.
En resposta á pregunta formulada pola deputada de En Marea, Julia Torregrosa, sobre sinistralidade laboral en 2018, Covadonga Toca puxo en valor o descenso da sinistralidade nos últimos 10 anos ata nun 45%.
A deputada de En Marea cuestionou á directora xeral de Emprego sobre as "medidas da Xunta" para paliar a situación galega "claramente anormal", ao superar en 2018 a media estatal de accidentes laborais. O pasado ano houbo 50 falecidos durante a xornada laboral e 6 'in itinere'.
Torregrosa recolleu os datos do informe elaborado por Comisións Obreiras, que reflicten que Galicia é a "quinta comunidade" en España con máis accidentes laborais, sendo "o máis preocupante" o valor de 6,05 sinistros mortais por cada 100.000 traballadores, o "dobre" da proporción do Estado.
Segundo o Instituto Galego de Seguridade e Saúde Laboral (ISSGA), o pasado ano, expuxo, producíronse 30.972 accidentes de traballo con baixa en Galicia e ata o 21% foron sufridos por persoas con menos de tres meses de antigüidade no seu posto de emprego.
Ademais, valorou que existe "relación entre precariedade e sinistralidade" posto que o "42% dos accidentes con baixa en xornada laboral en 2018 ocorréronlle a persoas con contrato temporal" e "o 28% do total de accidentes en empresas de 5 a 25 traballadores".
Pero na súa resposta, Covadonga Toca comparou as cifras de sinistralidade coas que se rexistraban fai dez anos, en 2008, en alusión á lexislatura na Xunta do bipartito de PSOE e BNG.
Así, resaltou que "a sinistralidade se reduciu un 45% no últimos dez anos", con 22.542 accidentes menos con baixa. Ademais, fixo fincapé na caída da incidencia dos accidentes laborais: fronte aos 5.797 por cada 100.000 persoas afiliadas de 2008 pasouse a 3.368 en 2018.
"En 2008 non gobernaba o PP nin en Galicia nin en España e non había reforma laboral de 2012 que sinala como unha das causas da sinistralidade, nin a reforma de 2010 do Goberno de Zapatero, se seguísemos o seu razoamento teriamos que concluír que ambas as reformas foron positivas pero sabemos que as realidades son máis complexas e non directamente relacionadas", replicou, ante a pregunta de Torregrosa sobre a relación entre a sinistralidade e a reforma de fai sete anos.
En todo caso, Toca aludiu a que "case a metade de persoas falecidas debéronse a infartos, derrames, a outras patoloxías non traumáticas ou a accidentes de tráfico", por considerar que se trata de "un aspecto importante para poder entender os datos.
"Inciden neste tipo de accidentes outros factores, como o estado das vías, o estado de saúde ou terceiros, aínda que loxicamente son accidentes de traballo pero que se sucedesen fose da xornada laboral, non o serían", puntualizou.
E en todo caso, os accidentes "con resultado de morte en 2018 foron" --remarcou-- o cuarto menor en toda a serie histórica". Ademais, lembrou que o feito de que a finais de ano ocorrese un sinistro marítimo "con 4 falecidos" incidiu nos valores finais. "Os acontecementos fan que ás veces se distorsionen as estatísticas".
