Por E.P. | SANTIAGO DE COMPOSTELA | 23/05/2019 | Actualizada ás 15:15
O director xeral de Planificación e Orzamentos da Xunta de Galicia, Miguel Corgos, atribuíu a "baixada" de execución dos fondos destinados a corporacións locais ás "transferencias de capital", porque están vinculadas a que os concellos acrediten que se finalizou a infraestrutura ou acción comprometida.
Así o transmitiu na Comisión de Economía celebrada no Parlamento, Miguel Corgos, en resposta á pregunta formulada polo PSOE sobre os "54 millóns de euros" de financiamento a administracións locais que se deixaron de gastar en 2018.
Corgos incidiu en diferenciar fondos condicionados e incondicionados, posto que algunhas das partidas teñen unha parte "finalista", de modo que "se o concello non acredita que realizou aquela actuación para a que se lle entregaron os fondos, a administración non pode recoñecer o pago, o que limita a execución. É unha responsabilidade compartida".
Así, referiuse en concreto ás "transferencias de capital", que son "máis complexas" e que situou como a "razón pola que baixa o nivel de execución". Neste sentido, explicou que se ten que valorar o gasto comprometido, que alcanzou o 99% do crédito vixente e ata o 104% do inicial. En cambio, a execución baixou en torno ao 76%, debido a que está "vinculada á execución de infraestruturas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.