Por E.P. | SANTIAGO DE COMPOSTELA | 23/05/2019 | Actualizada ás 19:08
O Consello da Xunta aprobou na súa reunión deste xoves o decreto polo que se crea e regúlase a Medalla Emilia Pardo Bazán, anunciada con motivo do 8 de marzo e que busca recoñecer aquelas accións relevantes levadas a cabo en favor da igualdade de oportunidades entre homes e mulleres.
A distinción concederase a individuos maiores de idade, colectivos, entidades privadas ou institucións públicas que leven a cabo actuacións "relevantes" no ámbito da igualdade e terá exclusivamente un carácter honorífico, sen dotación económica.
Cada ano concederanse ata un máximo de tres condecoracións, que revestirán a forma de medalla cando sexan a título individual e de placa cando sexa para colectivos ou entidades.
As candidaturas poderán ser propostas directamente por calquera persoa física ou xurídica, representantes de organismos, entidades, asociacións, ou calquera Administración pública que considere relevante destacar o labor doutras persoas. O prazo para presentar as solicitudes empezará o 15 de xaneiro de cada ano e concluirá o 12 de maio, no que as candidaturas se poderán presentar durante 20 días tras a publicación do decreto no Diario Oficial de Galicia.
As candidaturas serán posteriormente avaliadas por unha comisión de valoración, que estará composta por varios representantes da Xunta, do Consello Galego das Mulleres e da Casa Museo Emilia Pardo Bazán. A entrega realizarase o 16 de setembro, coincidindo co nacemento da escritora galega.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.