Feijóo admite que no PP buscaban resultados "mellores"

O presidente do PP galego, Alberto Núñez Feijóo, admitiu que os resultados destas eleccións municipais e europeas en Galicia "non son os que querían" desde o seu partido porque os buscaban "mellores", pero tamén lembrou que a Presidencia de Pablo Casado no PP estatal "xa está decidida" desde o Congreso Extraordinario celebrado en xullo de 2018.

O presidente do PP de Galicia, Alberto Núñez Feijóo, o secretario xeral do PP de Galicia, Miguel Tellado, o deputado Alberto Pazos Couñago e o eurodeputado Francisco Millán Mon valoran os resultados das eleccións do 26 de maio | Fonte: Europa Press

Así o expresou na súa comparecencia de prensa pasadas a medianoite deste domingo electoral para valorar o resultado dos comicios, nos que os populares se manteñen como primeira forza nas cidades de Ferrol, Lugo e A Coruña, pero sen alcanzar a maioría absoluta. "Somos conscientes de que non será fácil poder gobernar nas cidades", admitiu.

No entanto, Feijóo destacou que o PP continúa sendo en Galicia "o partido máis votado nas eleccións municipais" co 33,4 por cento dos votos e volveu sacar peito, como tamén o fixo na noite electoral das xerais do 28 de abril, de que o PP conseguiu 11 puntos porcentuais de diferenza en Galicia respecto do PP en toda España.

Así as cousas, o tamén presidente da Xunta garantiu "normalidade" e "acougo" a todos os galegos durante o "ano longo" que queda de lexislatura autonómica, na que asegura que "van seguir gobernando" coas "forzas recuperadas" despois de obter nas eleccións xerais do 28 de abril "un resultado bastante peor" que nas municipais.