A Xunta agarda ter "sinerxia e entendemento" con Bugallo de cara ao Xacobeo 21
Román Rodríguez di que "non é unha cuestión de dicir que é meu ou é teu" xa que o "proxecto" afecta a toda Galicia.
Por E.P. | SANTIAGO DE COMPOSTELA | 28/05/2019 | Actualizada ás 13:19
O conselleiro de Cultura, Román Rodríguez, asegurou este martes que a Xunta ten "vocación de entendemento" e de "xerar sinerxías" con Xosé A. Sánchez Bugallo de cara ao Xacobeo 21, tras a súa vitoria nas eleccións municipais do pasado domingo.
Preguntado acerca de se esperan cambios a nivel municipal tras os comicios, Román Rodríguez lembrou que o Camiño de Santiago "sempre se construíu sumando forzas e vontades", algo que, "historicamente", tamén ocorreu coa xestión dos Xacobeos.
"Esperemos que todos teñamos capacidade de sumar para construír un proxecto que non só é dunha importancia vital para Santiago, se non tamén para o conxunto de Galicia", dixo o conselleiro, para quen "as declaracións iniciais están a ir na boa liña".
A Xunta, dixo Román Rodríguez, "ten vocación de entendemento e de xerar sinerxías que posibiliten que o Xacobeo 21 sexa unha oportunidade para relanzar o moito e bo que ten Galicia", dixo o conselleiro, que reiterou a súa "vontade firme de colaborar".
No entanto, e sobre se esta organización débese capitanear desde o concello, Román Rodríguez lembrou que xa existen "diferentes órganos" traballando na conformación do Xacobeo, que implica a máis instancias que Santiago.
"Non é unha cuestión de dicir que é meu ou é teu", dixo Rodríguez, que indicou que, aínda que Santiago é "o punto final de referencia do Camiño", o "proxecto" afecta a toda Galicia e a varias comunidades autónomas. "Temos que traballar colectivamente", explicou.
