Preto da metade do alumnado falta ás 'reválidas' e a CIG eleva a abstención ao 80%

A Plataforma Galega en Defensa do Ensino destaca que o rexeitamento ás probas "non decae despois de cinco anos"

Por Europa Press / Redacción | SANTIAGO DE COMPOSTELA | 28/05/2019 | Actualizada ás 18:58

Comparte esta noticia

Os centros galegos acolleron este martes a primeira xornada das probas de avaliación de diagnóstico, as chamadas 'reválidas', en 3º e 6º de Primaria e en 4º de ESO. No seu quinto ano de implantación as familias continúan visibilizando o seu rexeitamento a este modelo evitando levar aos seus fillos a clase durante a celebración destes exames.

Continúa a loita contra as 'reválidas' en Galicia, con chamadas ao 'boicot' e a non acudir a clase durante as probas. PGEDEP
Continúa a loita contra as 'reválidas' en Galicia, con chamadas ao 'boicot' e a non acudir a clase durante as probas. PGEDEP | Fonte: Europa Press

Polo menos o 50 por cento dos alumnos non participou nas probas celebradas este martes, segundo os datos provisionais da Consellería de Educación, Universidade e Formación Profesional. Unha cifra que a CIG-Ensino e a Confederación Anpas Galegas elevan ao 80 por cento, manténdose así o apoio de anos anteriores ao 'boicot' convocado contra estas avaliacións.

Esta mobilización contra as probas prodúcese a pesar de que carecen de efectos sobre o expediente do alumnado, como si estaban expostas nun inicio. O Goberno de Mariano Rajoy e o PP viuse obrigado, debido á resposta social e ao rexeitamento xeneralizado, a modificar o que inicialmente eran exames esenciais para superar o curso e que pasaron a ser probas mostrais e sen repercusión na nota.

"É unha demostración de que levamos moitos anos tendo a razón e que continuamos téndoa. É algo que a xente non quere que fagan os seus fillos e oponse", sinalou Fernando Lacaci, representante desta entidade de Anpas.

Desde ese punto de vista, lamentou que os mozos "perdan días de clase un ano máis" e que os pais teñan "que recorrer a unha fórmula tan pouco agradable" para demostrar á administración que son eles os que deben "marcar o paso, e non unha norma que hai que derrogar canto antes", a Lomce.

Lacaci lembrou que existe unha resolución da Cámara estatal "instando" o Goberno á derrogación da chamada 'Lei Wert' e que "non saíu adiante por diversas manobras por parte da mesa do Parlamento da anterior lexislatura". "Pero agora mesmo -os partidos de esquerda- teñen unha maioría moitísimo máis ampla", matizou, polo que "se supón" que esta medida debería saír de "inmediato".

O REXEITAMENTO "NON DECAE"

A Plataforma Galega en Defensa do Ensino Público destacou que o 'boicot' ás probas supera de novo o 80 por cento de absentismo, sinalando que "o rexeitamento ás reválidas non decae despois de cinco anos", e advertindo de que moitos pais se viron obrigados a mandar aos seus fillos aos centros "pola imposibilidade de conciliar"

Así, aplaude ás familias galegas que puideron realizar ese "esforzo" e decidiron non enviar "masivamente" aos seus fillos aos centros, para visibilizar "o rexeitamento á Lomce", que volve ser "practicamente unánime".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta