Montse Lama (C's) ve "necesario" renovar "en políticos e en políticas" na Deputación de Ourense
Recoñece que o partido laranxa é "clave" para que Baltar siga ou non no goberno provincial, o que se decidirá nun comité nas próximas semanas.
Por E.P. | SANTIAGO DE COMPOSTELA | 29/05/2019 | Actualizada ás 15:04
A candidata de Ciudadanos á Alcaldía de Xinzo de Limia, a expopular Montse Lama, expresou este mércores que ve "necesario" renovarse "en políticos e en políticas" en Ourense, posto que a provincia precisa "avanzar".
Así o manifestou despois de coñecerse os resultados definitivos das eleccións municipais expostos pola xunta electoral, segundo os cales o partido laranxa irrompe na Deputación cun escano e o PP de Manuel Baltar queda a un da maioría absoluta, polo que o goberno provincial está, de momento, no aire.
Ciudadanos celebrará proximamente --aínda sen data-- un comité negociador para decidir sobre a súa política de pactos, xa que son "clave", segundo palabras de Lama, para inclinar a balanza cara a ben cara ao PP ou ben cara a un novo goberno socialista, para o que Cidadáns tería que pórse de acordo con PSOE, Democracia Ourensá (DO) e BNG, que sumarían os 13 da maioría absoluta.
En declaracións aos medios, a exdeputada provincial dos populares apuntou que Ourense "necesita mellores políticos e mellores políticas". No entanto, puntualizou que a decisión á hora de pactos non lle corresponde a ela senón a ese comité de negociación no que se exporán "todos os escenarios posibles".
Ademais, advertiu que esa competencia a ten a dirección nacional do partido, en Madrid, aínda que suxire que os concelleiros ourensáns "tamén teñen voz propia" nestas decisións.
"NON IR CARA ATRÁS"
En declaracións a Europa Press, Montse Lama insistiu en que cando abandonou as filas populares fíxoo apostando por "avanzar" e "rexenerar" a provincia e "non ir cara atrás". Así mesmo, avanzou que o órgano negociador estará capitaneado polo secretario de Organización de Cidadáns Galicia, Laureano Bermejo.
Pola súa banda, o recentemente electo concelleiro na cidade das Burgas expresou este luns nunha rolda de prensa que están "abertos a escoitar" a todas as formacións e descartou pór "liñas vermellas" a ninguén". "Ciudadanos vai pactar con políticas, non con políticos", expresou Bermejo.
