O TSXG celebra o venres a apelación do condenado por atropelar mortalmente a un mozo na Coruña
O acusado, segundo consta no fallo, pelexouse cos afectados nun pub do Orzán e, ao velos cruzar a vía por un lugar non habilitado para peóns, invadiu o sentido contrario da marcha e dirixiu o seu coche contra eles.
Por E.P. | A CORUÑA | 02/06/2019 | Actualizada ás 10:14
A Sala do Civil e Penal do Tribunal Superior de Xustiza de Galicia (TSXG) celebra o venres a vista de apelación pola sentenza que condenou a un mozo, J.G.V.Ou., a 26 anos de cárcere polo atropelo mortal doutro mozo na Coruña. A Sala do Civil e Penal do Tribunal Superior de Xustiza de Galicia (TSXG) suspendera o pasado martes esta vista de apelación por enfermidade da avogada do condenado.
De acordo co veredicto do Tribunal do Xurado, a sección segunda da Audiencia da Coruña condenou ao condutor, que tiña 19 anos, como autor de tres delitos de homicidio, un consumado e dous tentados, despois de que, durante a madrugada do 28 de outubro de 2017, atropelase á mantenta a tres novos no paseo marítimo herculino.
O acusado, segundo consta no fallo, pelexouse cos afectados nun pub do Orzán e, ao velos cruzar a vía por un lugar non habilitado para peóns, invadiu o sentido contrario da marcha e dirixiu o seu coche contra eles. Como consecuencia do impacto, o mozo que camiñaba adiantado, de 24 anos, saíu despedido cara ás vías do tranvía e faleceu uns 45 minutos despois, mentres que un dos seus acompañantes sufriu lesións leves. A terceira persoa non foi alcanzada polo vehículo.
A Audiencia sinala, na sentenza, que o xurado considerou probado que o sospeitoso "executou os feitos co propósito de acabar coa vida do tres peóns, aceptando como posibilidade que se producise a morte, ou lesións, de todos ou algún deles".
