Buscan voluntarios para a recollida de residuos en espazos ao aire libre

Galicia sumarase o próximo 15 de xuño á recollida voluntaria de residuos en espazos ao aire libre, o que se coñece co concepto 'basuraleza' --'littering' en inglés--, e que consistirá nunha batida por distintos puntos da xeografía galega na que poderán participar voluntarios e colectivos de todos tipo para conseguir limpar estes espazos.

Na presentación da campaña este xoves participaron a directora xeral de Calidade Ambiental e Cambio Climático, Cruz Ferreira, e o xerente de Ecoembes na zona norte de España, Fernando Blázquez, quen fixeron un chamamento á participación e a superar os 500 voluntarios e 25 puntos de recollida da campaña do pasado ano e que se desenvolve no marco do programa Libera --con tres dimensións: coñecer o problema, previlo e participar--.

Fernando Blázquez explicou que a 'basuraleza' afecta na actualidade a 800 especies mariñas e costeiras, por accidentes, enredos e impactos directos no hábitat. Outro dato: as cabichas de cigarros son os residuos que máis aparecen no campo e, a nivel mundial, a cifra elévase a 6 billóns, dos que 4 billóns e medio acaban na natureza. Cada cabicha contamina 50 litros de auga doce.

"É fundamental saír á rúa o día 15 para, todos os galegos, facer algo grande. Non custa nada limpar un metro cadrado pola natureza", manifestou Blázquez, quen avogou por manter a "contorna espectacular" que ten Galicia. A Xunta colabora neste proxecto de concienciación e actuación cidadá e que está aberta a todos os colectivos, entidades e persoas que queiran sumarse e achegar o seu "gran de area para coidar a natureza".

Ata o próximo día 9, calquera cidadáns pódese adherir a un grupo non conformado aínda (para logo determinar un punto de recollida) e ata o 14 de xuño pódese sumar calquera persoa a un dos grupos de batidas xa conformados.

LEI DE RESIDUOS

A directora xeral de Cambio Climático subliñou que o Goberno galego traballa nunha lei de residuos, agora en período de examinar alegacións, e que nela xa se inclúen medidas para reducir os plásticos en ámbitos como o enxoval dun só uso. Ademais, conta coa estratexia de sustentabilidade 2020-2030 e traballa na conciencianción de eventos sustentables --como festivais ou feiras e 'feirones'-- ou en citas deportivas, así como impulsando as chamadas 'escolas verdes'.

Blázquez, preguntado por se se debería premiar a reciclaxe, manifestou que "o premio é o coidado da contorna, a satisfacción do deber ben feito". "Non porque nos premien por diñeiro, senón porque temos que deixar un planeta aos nosos fillos", sentenciou.

Ecoembes | Fonte: Europa Press