Delegados da CIG mobilízanse en Galicia para esixir a derrogación das reformas laborais

Delegados da CIG mobilizáronse en distintas localidades galegas para esixir ao Goberno que "non demore máis" a derrogación das reformas laborais, dentro dunha campaña posta en marcha polo sindicato pola "recuperación dos dereitos". Este foi o lema dunha protesta que no caso da Coruña concentrou a case medio centenar de representantes sindicais ante a Delegación do Goberno en Galicia.

Alí, nun acto que contou coa presenza do secretario xeral da CIG, Paulo Carril, corearon proclamas como 'Queremos traballar e non mendigar' ou 'Derrogación da reforma laboral'.

En concreto, con estas mobilizacións, a CIG pretende denunciar "a perda de dereitos" que, para a central, supuxeron as reformas laborais, das pensións e de negociación colectiva, aprobadas polo PSOE ou o PP.

Na protesta ante a Delegación do Goberno en Galicia, o secretario xeral da CIG denunciou que as relacións laborais xurdidas destas reformas "facilita o desmantelamento industrial" e a "perda" de emprego, apuntou en alusión aos casos de Alcoa ou Ferroatlántica.

Por outra banda, asegurou que o paro rexistrado pon de manifesto unha contratación estacional en Galicia. Así, incidiu en que, a pesar de que se asinaron 95.000 contratos no mes de maio, o desemprego "só baixou en 5.421 persoas". "O que constata esa verdade tan cruel de que a pobreza e a explotación laboral que permitiu a reforma laboral está a implantarse de maneira definitiva".

Coincidindo coa concentración ante a Delegación do Goberno, a CIG entregou un escrito dirixido ao presidente do Executivo e ao Ministerio de Traballo coas reivindicacións e propostas da CIG para a nova lexislatura e demandando un cambio nas políticas económicas, laborais e sociais.