Galicia é a segunda comunidade na que menos sobe o prezo da vivenda

O prezo da vivenda subiu en Galicia un 3,6% no primeiro trimestre deste ano en comparación co mesmo período de 2018, segundo os datos que publica este venres o Instituto Nacional de Estatística (INE).

Deste xeito, Galicia é a segunda comunidade na que menos sobe o prezo, xa que só Estremadura (+2,4%) ten un incremento inferior. A media de subida entre autonomías é do 6,8%. No outro extremo, hai un avance do 9,7%.

Pola súa banda, hai unha subida do 0,5% respecto ao anterior trimestre, o mesmo que a media no que vai de ano, pero por baixo da media do 0,8%. No tocante á vivenda nova, hai un incremento no prezo do 7,3%, a terceira máis baixa, só por encima de Andalucía (+7%) e Asturias (+7,2%). En comparativa co último trimestre de 2018 crece un 2,1%.

Respecto da vivenda de segunda man, hai un aumento do 2,9% en Galicia, tamén a terceira máis baixa do país. Na variación intertriemstral hai unha alza do 0,3%.

DATOS ESTATAIS

O prezo medio da vivenda libre subiu en España un 6,8% no primeiro trimestre en taxa interanual, dúas décimas máis que no trimestre anterior, segundo o Índice de Prezos de Vivenda (IPV) do Instituto Nacional de Estatística (INE) publicado este venres.

Por tipo de vivenda, o prezo medio das de segunda man aumentou un 6,2% interanual no primeiro trimestre, dúas décimas menos que no trimestre anterior. No caso das vivendas novas, o seu prezo avanzou unha media do 10,4% no mesmo período, case dous puntos e medio superior á do trimestre anterior e a máis alta desde o cuarto trimestre de 2007.

En taxa intertrimestral, o prezo medio da vivenda repuntou un 1,5% entre xaneiro e marzo, fronte á alza do 0,4% que rexistrou no trimestre anterior e do 1,4% do primeiro trimestre de 2018.