Pontón denuncia movementos "estraños" do Partido Socialista en Barreiros e Fene

A portavoz nacional do BNG, Ana Pontón, asegurou este sábado que nos concellos "onde o PP non ten maioría (absoluta)" o Bloque "actuará con responsabilidade" para impedir que "as alcaldías non caian en mans da dereita". Refírese a casos como os de Catoira ou a Fonsagrada, na que houbo contactos entre nacionalistas e populares.

Neste sentido, tamén pediu "responsabilidade" ao PSdeG "para garantir gobernos municipais alternativos" ao Partido Popular, centrándose en dous casos concretos, o dos concellos de Barreiros (Lugo) e Fene (A Coruña), onde o Partido Socialista realizou "movementos estraños".

"Espero que o PSOE estea á altura do que dixeron os veciños", sentenciou Pontón, quen engadiu que o BNG si que o estará "e será freo de contención da dereita en todos os casos en que sexa posible".

Así mesmo, destacou que no caso de Pontevedra, hai dúas alternativas, ou que o BNG goberne en solitario ou co PSOE. "Os pontevedreses queren que Miguel Anxo Fernández Lores siga sendo alcalde da cidade", insistiu a portavoz nacionalista.

DEPUTACIÓNS

Sobre a situación na que quedarán as deputacións, Pontón explicou que "non é o momento de falar ou concretar", xa que o Bloque "está a centrar todos os seus esforzos" a nivel municipal. Con todo, puxo en valor realizado polos deputados nacionalistas no pasado mandato no ámbito provincial.

Así, insistiu no compromiso "claro" do BNG para que sexan "institucións transparentes", que teñan un compromiso "cos concellos" e non "partidistas".

Así o sinalou Pontón na súa intervención tras o primeiro Consello Nacional do BNG celebrado despois das eleccións municipais e europeas do pasado 26 de maio, onde indicou que a posición "concreta" do voto do Bloque o día 15 de xuño nas investiduras dos municipios "forma parte do debate que se ten que producir no ámbito local".

"É evidente que hai moitos concellos nos que os cidadáns nos situaron na oposición e nós imos facer ese traballo con todo o rigor. Onde nos dan a posibilidade de ter opcións de cogoberno, pois imos actuar responsablemente, pensando sempre no mellor para esas cidades e en que hai que analizar caso a caso", indicou Pontón.

REMONTADA

A pesar do retroceso en votos do BNG nos comicios municipais --non así nos europeos--,Ana Pontón dixo que o 26M supuxo a "consolidación" da "remontada" do BNG, xa que o Bloque foi terceira forza política en Galicia nas municipais e nas europeas duplicou o número de votos.

Así mesmo, nas municipais "cumpriu os seus obxectivos", aumentando o seu peso "de forma notable" con 14 maiorías absolutas, 10 simples e outro cinco concellos con opción de alcaldía "onde é a forza maioritaria alternativa ao PP". Neste sentido, agradeceu o apoio dos "miles de galegos" que votaron ao BNG

POLÍTICA MUNICIPAL

Ana Pontón tamén avanzou que o BNG convocará "a principios de xullo" un encontro nacional de política municipal "onde trazará as liñas de actuación conxuntas para engrasar e combinar toda a política local".

"Trátase dun evento importante para o Bloque, que marcará as liñas de traballo a nivel municipal do próximos catro anos, onde seguiremos avanzando na consolidación dunha política municipal que ben desde a oposición ou os gobernos, vai traballar para mellorar a calidade de vida dos veciños", sinalou.