Amador Castro, Emma Pedreira e Rosa Aneiros fanse cos Premios Xerais 2019

En total, este ano concorreron 28 obras a este premio.

Por Europa Press / Redacción | SANTIAGO DE COMPOSTELA | 08/06/2019 | Actualizada ás 17:55

Comparte esta noticia

Amador Castro, Emma Pedreira e Rosa Aneiros fixéronse cos Premios Xerais 2019, que este sábado deu a coñecer o fallo da edición deste ano en Vigo, segundo informou a propia editorial.

Así, a XXXIV edición do Premio Merlín de Literatura Infantil recaeu en Rosa Aneiros (Meirás-Valdoviño, 1976) con 'Xelís, ou guieiro das botellas de mar', que foi elixida os membros do xurado entre 28 obras que concorreron ao concurso, dotado con 10.000 euros de premio.

Ademais de colaborar habitualmente en distintos medios de comunicación pola súa formación de xornalista, Aneiros traballa no Consello da Cultura Galega e conta con diversas novelas publicadas, como 'Eu de maior quero ser' ou 'Ás de bolboreta'.

Rosa Aneiros agradeceu a Xerais o premio e explicou que na súa obra "denuncia a deterioración do planeta, en particular dos océanos pola contaminación dos plásticos", pero tamén se trata dun libro "de esperanza sobre o poder da amizade e da forza de nós".

PREMIO JULES VERNE

Pola súa banda, a filóloga, poeta e narradora, Emma Pedreira (A Coruña, 1978), recibiu o XI Premio Jules Verne de Literatura Xuvenil coa súa obra 'Os corpos invisibles', que foi elixida entre 20 textos e tamén estará galardoada con 10.000 euros.

"Gañar o Jules Verne é unha absoluta sorpresa. Téñolle moitísimo respecto á literatura escrita para ese que é o público máis esixente, natural e curioso, pero tamén o máis agradecido, o infanto-xuvenil. Tardei en chegar ata aquí e decidirme a escribir unha historia que me leva a dialogar coa xente máis nova", sinalou tras coñecer a noticia.

Emma Pedreira gañou o ano pasado o Premio Xerias de Novela con 'Besta do seu sangue' e, ademais desta obra, conta con multitude de libros, como 'As posturas do día' ou 'Bibliópatas e fobólogos', que conseguiu o Premio da Crítica de narrativa galega 2018.

PREMIO XERIAS DE NOVELA

Así mesmo, o xurado da XXXVI edición do Premio Xerais de Novela, dotado tamén con 10.000 euros e ao que concorreron 44 obras, outorgou a Amador Castro (Nandulfe-Chantada) dito galardón polo seu título 'Xangai a Barcelona'.

Castro publicou dous libros: 'Memorias de antes do encoro' e 'Pillabán, pillabán'. El mesmo recoñeceu que "comezou tarde nisto da novela" pero non "na literatura". "Un día atópaste con tres novelas no peto e andas dándolle voltas á seguinte. A que absorberá a túa mente durante uns meses", subliñou.

A festa de entrega dos galardóns terá lugar no mes de outubro coincidindo coa aparición dos libros editados das obras gañadoras.

Amador Castro, Enma Pedreira e Rosa Aneiros fanse cos Premios Xerais 2019. EDITORIAL XERAIS - Arquivo
Amador Castro, Enma Pedreira e Rosa Aneiros fanse cos Premios Xerais 2019. EDITORIAL XERAIS - Arquivo | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta