A CIG denuncia o "abusivo" peche de camas para o verán nos hospitais da área de Santiago

A CIG-Saúde censurou o intento da Xerencia da área sanitaria de Santiago de Compostela de tentar normalizar o "abusivo" peche de camas nos hospitais durante o período estival. O sindicato cualifica de "absurdo" o argumento do descenso na actividade asistencial, a falta de persoal para substitucións e a necesidade de acometer obras de acondicionamento.

"Pechar de súpeto sete dos 15 quirófanos do Clínico dicindo que hai que facer reformas é unha moi mala desculpa para pechar camas", asegura a central nacionalista.

Fronte a iso, afirmou que durante o verán non pode diminuír a actividade asistencial tendo en conta que "as poboacións das zonas de costa, como mínimo, duplícanse nesa época e as vilas do interior tamén se enchen cos centos de persoas que veñen de fóra".

En todo caso, a CIG subliña que as persoas tamén enferman no verán e considera que non se está facendo unha "xestión eficiente e eficaz" ao "paralizar as listas de espera de verán para baixalas despois traballando arreo no último trimestre" con "peonadas e horas extra".

O sindicato nacionalista defendeu unha xestión sanitaria "continuada" durante 365 días ao ano baseada nunha "atención de calidade e centrada no paciente". "Non se pode deixar os hospitais a medio gas, xa que iso implica un incremento de traballo tanto en atención primaria como en PAC", sinala.

A CIG tamén acusa a xerencia de "parchear" a falta de profesionais médicos "inventando un sistema destrutivo cunha lista de voluntariado para gardas médicas localizadas" que, segundo denunciou, "sobrecargan os traballadores".