Persoal de PAC de Galicia concentrarase ante o Sergas pola "falta de resposta" á petición de mediación
A acción terá lugar este xoves ás 17,00 horas.
- Denuncian "incumprimento dos servizos mínimos" en PACs da provincia de Pontevedra o fin de semana
- A CIG denuncia o "abusivo" peche de camas para o verán nos hospitais da área de Santiago
Por E.P. | SANTIAGO DE COMPOSTELA | 12/06/2019 | Actualizada ás 12:17
Traballadores de Puntos de Atención Continuada (PAC) de Galicia concentraranse este xoves diante da sede do Servizo Galego de Saúde (Sergas), en Santiago, ante a "falta de resposta" á petición de mediación e ao "incumprimento reiterado dos servizos mínimos" na folga indefinida que manteñen desde hai meses.
Segundo informou o colectivo PACs en Pie de Guerra, os representantes das diferentes PACs de toda Galicia reuníronse estes días cos traballadores nas súas respectivas áreas para "avaliar o acontecido coas coberturas durante as últimas semanas" e "seguir planificando as próximas accións mentres se segue á espera de que o Sergas sente de novo a negociar".
Por parte do comité de folga solicitouse unha reunión co conselleiro de Sanidade, Jesús Vázquez Almuiña, desde o pasado 14 de maio e desde o día 24 están "á espera de que o Sergas responda á solicitude de mediación pedida", denunciaron. "Ata a data non hai resposta a ningunha das dúas peticións", lamentaron.
Por iso, os traballadores continuarán en folga e mostraron "a súa preocupación" para afrontar o seu traballo durante o verán tras "os últimos incumprimentos dos servizos mínimos".
Por iso, "ante a indiferenza e o nulo interese mostrado polo Sergas", resaltou o colectivo, nas reunións realizadas nas diferentes zonas de Galicia acordouse participar na concentración que terá lugar este xoves ás 17,00 horas con motivo da reunión do Consello Técnico de Atención Primaria no edificio administrativo do Sergas, á que convidan "a toda a cidadanía e persoal sanitario a unirse".
