Por E.P. | SANTIAGO DE COMPOSTELA | 13/06/2019 | Actualizada ás 18:03
Galicia rexistrou unha primavera climatolóxica cálida pero normal en canto ás precipitacións, aínda que con cambios "moi bruscos de temperatura" e con valores algo máis elevados do habitual para a época do ano. A temperatura media durante o últimos tres meses alcanzou os 12,8 graos, un valor lixeiramente maior do habitual --0,4 graos máis--, segundo o resumo do informe estacional elaborado por Meteogalicia.
A anomalía positiva debeuse a que as temperaturas máximas foron moi cálidas para a época do ano, aínda que se viron suavizadas polos valores das mínimas, que resultaron lixeiramente frías. Se algo marcou este tres últimos meses en Galicia foi a variabilidade, con cambios continuos e bruscos nas temperaturas.
En marzo rexistráronse grandes oscilacións térmicas, abril foi un mes de caídas e subas bruscas dos termómetros e maio estivo marcado polas entradas de aire africano, que provocaron xornadas de tempo seco e moi caloroso, especialmente o tres últimos días do mes. En todo caso, tamén houbo notables descensos térmicos, sobre todo en marzo e abril, e ata 20 días de precipitacións en forma de neve nalgunhas zonas altas de Galicia, en oito deles, con neve abundante.
ABRIL MOI HÚMIDO, MAIO MOI SECO
Aínda que as choivas rexistradas están en valores normais no marco do período de referencia 1981-2010, choveu un 3% máis que a media, con 312 litros por metro cadrado. Hai, con todo, excepcións, como a da Serra do Suído, fronteiriza entre as provincias de Pontevedra e Ourense, na que se alcanzaron os valores de choiva acumulada máis altos de toda Galicia: preto de 1.300 litros por metro cadrado.
Os meses foron bastante desiguais. Marzo mantívose na normalidade, abril foi moi húmido, cun 72% máis da media e maio, en cambio, moi seco, cunha única xornada de precipitacións xeneralizadas --o día 9-- e un déficit de choivas do 62%. Os contrastes entre o comportamento meteorolóxico de abril e maio explican que o balance global da estación se mantivese dentro dos valores considerados normais, xa que a abundancia de choivas dun mes compensou a carencia pola que estivo marcado o outro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.