O BNG designa aos seus deputados provinciais pero pide a “desaparición” das deputacións
Os nacionalistas, que terán responsabilidades de goberno nos entes da Coruña, Pontevedra e Lugo, din que, mentras non desaparezan, traballarán para rematar co “caciquismo”. As deputacións galegas moven centos de millóns de euros en orzamentos anuais.
Por Galicia Confidencial | Pontevedra | 18/06/2019 | Actualizada ás 20:35
O BNG designou aos concelleiros e concelleiras que pasarán a formar parte das deputacións provinciais da Coruña, Ourense e Pontevedra. Con todo, esta formación insiste na necesidade de que “desaparezan” estes órganos administrativos, a pesar de que teñan responsabilidade de goberno neles.
No caso da Deputación de Lugo a designación queda aprazada até o mes de xullo, unha vez conclúan as reclamacións presentadas por algúns concellos desta provincia en relación ao resultado electoral do 26M.
Segundo informa o BNG nun comunicado, un total de oito concelleiros e concelleiras desenvolverán tamén o papel de deputados e deputadas provinciais nas mencionadas institucións en representación do BNG. Así, na Deputación da Coruña repite esa responsabilidade polo partido xudicial de Carballo Xosé Regueira, edil no concello da capital de Bergantiños; Xurxo Couto, concelleiro por Arteixo, dentro do partido xudicial da Coruña; María do Carme Muíño, concelleira en San Sadurniño polo partido xudicial de Ferrol e Xosé Lois Pena, concelleiro en Brión, polo partido xudicial de Santiago.
Para a Deputación de Ourense, Bernardo Varela López, concelleiro en Allariz, e no caso da Deputación de Pontevedra repite como deputado provincial Cesar Mosquera, concelleiro na cidade do Lérez, e asume esa responsabilidade María Ortega, concelleira en Moaña, ambos dentro do partido xudicial de Pontevedra. Tamén repite como deputado provincial polo partido xudicial de Tui Uxío Benítez, concelleiro en Tomiño.
“DESAPARICIÓN”
O BNG insiste en que mantén a súa posición política en relación ás deputacións provinciais, “avogando pola súa desaparición por considerar que se trata de institucións que responden a unha distribución administrativa obsoleta”. Neste sentido, aposta pola súa supresión e por trasladar as súas actuais competencias cara a Xunta e cara os concellos, segundo corresponda.
“En todo caso, e mentres non se logra a súa eliminación, o BNG defende un funcionamento eficaz, transparente e a favor dos concellos con total independencia da cor política dos gobernos municipais”, engade nun comuicado. Por iso, aclara que traballou e seguirá traballando tanto desde dentro como desde fora dos gobernos provinciais, “para que sexan institucións libres de caciquismo e favoritismos e para que sexan entidades que xestionan os seus recursos en beneficio da veciñanza das vilas e cidades do país”. As deputacións galegas moven centos de millóns de euros en orzamentos anuais.
