O emprego turístico en hostalaría e axencias de viaxe crece un 4,1% en Galicia
En cifras absolutas, a Comunidade situouse en maio como a quinta rexión española onde se produciu un maior incremento.
Por E.P. | SANTIAGO DE COMPOSTELA | 18/06/2019 | Actualizada ás 18:27
Os afiliados á Seguridade Social vinculados ás ramas de hostalaría, axencias de viaxe e operadores turísticos creceu no mes de maio en Galicia un 4,1%, ata os 82.430 traballadores, segundo os datos publicados este martes por Turespaña, organismo dependente do Ministerio de Industria, Comercio e Turismo.
O repunte galego estivo motivado polo aumento dos asalariados, un 4%, nove décimas menos que a media nacional (4,9%), ata totalizar 59.271; mentres que o emprego autónomo caeu un -0,7% no quinto mes do ano en Galicia, con 23.159 traballadores por conta propia, fronte ao conxunto do país onde creceu medio punto.
En cifras absolutas, Galicia situouse o mes pasado como a quinta comunidade onde se produciu un maior incremento, por detrás de Andalucía, Comunidade Valenciana, Cataluña e Madrid. Sumando Murcia, este seis rexións españois supoñen o 78,2% do incremento interanual absoluto. Con estes datos, Galicia representa o 4,5% do total de afiliados á Seguridade Social españois neste ámbito.
NACIONAL
A nivel estatal, o número de traballadores dados de alta na Seguridade Social en actividades vinculadas a todo o sector turístico aumentou un 4,3% en maio, ata superar os 2,57 millóns de persoas. A cifra, que é a máis alta da serie histórica nun mes de maio, implica que os afiliados en actividades turísticas supuxeron o 13,3% do total de afiliados na economía nacional.
Así, no conxunto da economía nacional, o total de afiliados creceu un 2,6% en maio, o que supuxo a creación de 494.849 empregos, dos cales 106.793 corresponderon a actividades vinculadas co turismo. Este crecemento explícase principalmente polo repunte dos asalariados, que aumentaron nun 5,1%, ata superar os 2,08 millóns de afiliados e representan o 80,9% do total, fronte ao crecemento do 1,3% de autónomos, que suman 491.809 persoas (19,1% do total).
En hostalaría e axencias de viaxes/operadoras turísticos conxuntamente os afiliados en alta laboral á Seguridade Social aumentaron un 4,1% en taxa interanual, crecendo tanto os asalariados (+4,9%) como os autónomos (+0,5%).
