Por Europa Press / Redacción | SANTIAGO DE COMPOSTELA | 21/06/2019 | Actualizada ás 13:35
A convocatoria aberta de proxectos 'O teu Xacobeo' permitirá impulsar 352 iniciativas de dinamización en máis dun centenar de concellos galegos con motivo do Xacobeo 21 e co obxectivo de que o conxunto da sociedade galega "programe boa parte deste gran evento".
Así o dixo o conselleiro de Cultura, Román Rodríguez, durante a presentación da resolución deste proxecto, que conta cun investimento por parte da Xunta de 4,7 millóns de euros e que permitirá mobilizar preto de nove millóns. Á rolda de prensa asistiu tamén a comisaria do Xacobeo 21, Cecilia Pereira.
Román Rodríguez destacou a "gran acollida" que tivo esta iniciativa, impulsada co obxectivo de "fomentar a participación colectiva" no Xacobeo, "estender" a celebración por toda Galicia e "desestacionalizar" a cita. En total, explicou, recibíronse 652 propostas no tres liñas de axuda abertas, un interese que levou á Xunta a ampliar o orzamento inicial de dous millóns de euros ata os 4,7 millóns.
No relativo á primeira liña de axudas, destinada a proxectos formulados por entidades locais, impulsaranse un total de 80 proxectos, que contará cun investimento de preto dun millón de euros. A segunda liña favorecerá a posta en marcha de 89 iniciativas propostas por pemes e particulares, nas que se investirán preto de 1,5 millóns de euros en proxectos centrados no desenvolvemento rural, o impulso do talento emerxente ou o fomento da igualdade. Por último, a terceira liña de axudas permitirá que boten a andar 183 propostas de entidades públicas ou privadas sen ánimo de lucro, cun orzamento de dous millóns de euros.
CINCO ÁMBITOS DE ACTUACIÓN
O conselleiro de Cultura recalcou que 'O teu Xacobeo' representa o carácter "participativo, descentralizado e sustentable" do próximo Ano Santo e confiou en que isto permita ampliar a repercusión da celebración.
As iniciativas seleccionadas abarcan un total de cinco áreas: o ámbito artístico, patrimonio-historia-pensamento-espiritualidade, gastronomía, ámbito deportivo e ámbito social. As iniciativas desenvolveranse ao longo deste ano e ata maio do próximo en distintos puntos de Galicia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.