Por E.P. | SANTIAGO DE COMPOSTELA | 23/06/2019 | Actualizada ás 18:20
O conselleiro do Medio Rural, José González, reuniuse este domingo cos veciños de Osmo, no municipio ourensán de Cenlle, para felicitalos por presentar, en colaboración co concello, a súa candidatura para ser declarada como primeira 'Aldea modelo' de Galicia na defensa contra os incendios forestais.
Neste sentido, o conselleiro tamén trasladou a súa felicitación ao alcalde, Gabriel Alén, que estivo presente na reunión, así como á delegada territorial da Xunta en Ourense, Marisol Díaz. Neste caso, o concello de Cenlle propón a aldea de Osmo por dispor dunhas 20 hectáreas de terreo abandonadas nas súas franxas de protección e que o pasado ano tiveron un aproveitamento agrícola ou gandeiro.
José González explicou, segundo recolle a Xunta nun comunicado, que o fin último de creación da aldea modelo é defender as persoas e os bens da ameaza dos incendios forestais, "pero non se trata unicamente diso, xa que tamén se pretende fomentar a posta en marcha de actividade agrogandeira na franxa dos 50 metros próxima ás vivendas".
"O proxecto de Aldeas modelo nace co obxectivo de executar a limpeza das franxas secundarias, é dicir, aquelas que están máis próximas aos núcleos de poboación, e polas a producir", engadiu o conselleiro. Unha vez limpas esas franxas, porase en valor ese terreo creando actividade agrogandeira nelas, mediante cultivos de horta, cereal, pastos, froitas, castiñeiros e oliveiras, entre outros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.