Un incendio nun hostal de Sada obriga a desaloxar un centenar de persoas
O servizo de emerxencias 112 puntualizou que "ningunha persoa resultou ferida nin afectada" debido a este incendio, polo que foron mobilizados os Bombeiros de Betanzos.
Por E.P. | SANTIAGO DE COMPOSTELA | 27/06/2019 | Actualizada ás 18:06
Un centenar de persoas foi desaloxado por precaución este xoves do restaurante dun hostal na localidade coruñesa de Sada tras rexistrarse un incendio nunha habitación, pero non houbo persoas feridas, informou o 112 Galicia.
Segundo os datos facilitados pola Policía Local, o incendio rexistrouse no Hostal As Rodas, situado na estrada do Espírito Santo, na zona da N-V.
O servizo de emerxencias 112 puntualizou que "ningunha persoa resultou ferida nin afectada" debido a este incendio, polo que foron mobilizados os Bombeiros de Betanzos. Ademais, foron avisados Protección Civil de Sada, a Policía Local e a Garda Civil.
Fontes do hostal comentaron que os feitos sucederon sobre as 12,30 horas deste xoves e reducírono a un "susto" pola cantidade de fume causado por un "pequeno incendio" nunha habitación, o que levou ao desaloxo por precaución.
