As licenzas para construír novos edificios en Galicia soben en marzo un 11% en comparación con 2018
Houbo tamén 15 obras de demolición en marzo.
Por E.P. | SANTIAGO DE COMPOSTELA | 28/06/2019 | Actualizada ás 11:16
As licenzas para construción de novas edificacións en Galicia incrementáronse en marzo nun 11%, en comparación co mesmo mes do ano anterior, ao ascender a 121. Ademais, concedéronse en marzo 123 obras de rehabilitación e 15 para obras de demolición de edificios, segundo os datos publicados este venres polo Instituto Galego de Estatística.
As licenzas permitirán construír 88 novas vivendas, mentres que as creadas en rehabilitación serán 39 e as que se demolerán 13. En termos netos, a variación do parque de vivendas no pasado mes de marzo foi, por tanto, positiva, con 114 novas vivendas.
En comparación cos datos de hai un ano, rexístrase unha tendencia en aumento, posto que se incrementa o número de edificios a construír de nova planta en 12 unidades: 121 en marzo de 2019 fronte a 109 no mesmo mes de 2018.
O número de vivendas a crear en nova planta diminúe, con todo, en 136 unidades en relación ao rexistrado hai un ano. En canto aos edificios a rehabilitar, tamén aumentan, con 123 en marzo de 2019 fronte aos 116 de marzo de 2018.
