Por Europa Press / Redacción | SANTIAGO DE COMPOSTELA | 02/07/2019 | Actualizada ás 20:23
A eurodeputada do BNG, Ana Miranda, expresou este martes que "a esperanza de atopar a verdade e a xustiza" para as vítimas do accidente do Alvia ocorrido o 24 de xullo de 2013 en Angrois, en Santiago de Compostela, "segue estando de Europa". Así o manifestou tras o seu encontro mantido coa Defensora Europea do Pobo --Ombudsman--, a irlandesa Emily O'Reily, na xornada de arranque da lexislatura no Parlamento europeo, en Estrasburgo (Francia).
Precisamente, esta institución europea admitiu a trámite hai menos de dúas semanas unha reclamación da plataforma de vítimas do sinistro en relación ao acceso ao expediente sancionador que a Comisión Europea interpuxo contra España por incumprimento da normativa de seguridade ferroviaria.
Neste contexto, Ana Miranda valorou "o grande interese e dispoñibilidade mostrado pola Valedora Europea do Pobo polo caso Alvia", que deixou 80 vítimas mortais e máis de 140 feridos. Ademais, a eurodeputada informoulle do apoio do BNG á demanda da plataforma de afectados.
Así mesmo, explicoulle a Emily Ou'Reilly que en 2017 o Bloque presentou unha denuncia contra o Estado español por "incumprir a normativa de seguridade ferroviaria". Precisamente, en xaneiro deste ano, transcendía a apertura dun procedemento sancionador por parte da Comisión Europea a España por este mesmo motivo.
En relación con este proceso, Ana Miranda indicou que España pediu "aprazalo" e acaba de enviar un plan para aplicar a normativa de seguridade. No entanto, a eurodeputada nacionalista cre que "mentres non se faga por decreto ou lei, é como un papel mollado enviado á Comisión".
Así as cousas, reclamou ao Executivo de Pedro Sánchez a apertura dunha investigación "independente" e "non como a que fixo" a Comisión de Investigación de Accidentes Ferroviarios (CIAF) no 2015 e que foi "cuestionada" pola Axencia Ferroviaria Europea (ARE) en 2016.
"O novo Goberno debería empezar por levar a cabo esa investigación tendo en conta a indefensión das vítimas do Alvia, que durante seis anos non contaron co apoio dos sucesivos gobernos", lamentou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.