A gastronomía sitúase como o segundo motivo polo que os turistas visitan Galicia
A comunidade conta con 11 restaurantes Estrela Michelín e con máis de 300 festas enogastronómicas.
Por Europa Press / Redacción | SANTIAGO DE COMPOSTELA | 03/07/2019 | Actualizada ás 17:22
A gastronomía galega é o segundo motivo polo que os turistas visitan Galicia, nunha comunidade con 11 restaurantes Estrela Michelín e con máis de 300 festas enogastronómicas.
Así o destacou o presidente da Xunta de Galicia, Alberto Núñez Feijóo, durante a celebración do Encontro Internacional de Cociñeiros 'Cociña+Conciencia', que reúne en Santiago de Compostela a máis de 50 chefs de recoñecido prestixio e procedentes de todo o mundo.
A cita permitirá a Galicia situarse como punto de encontro e reflexión sobre o devir da gastronomía galega, española e internacional, resaltou Feijóo. No acto, o presidente da Xunta incidiu en que 'Galicia Calidade' non é só unha marca senón "o cartón de presentación" dunha comunidade na que o goberno galego seguirá comprometida coa gastronomía para que siga sendo un dos eixos estratéxicos do modelo turístico.
A comunidade conta con 11 restaurantes con Estrela Michelín, máis de 20 Bib Gourmand, 35 Soles Repsol e 61 distincións Q de Calidade para os seus restaurantes. Ante a proximidade do Xacobeo 2021, Feijóo convidou aos participantes no acto a percorrer a xeografía galega, na que atoparán a "calidade e inspiración" dunha gastronomía que mestura a cociña tradicional coa de vangarda.
