Sancionados dous espectadores por alentar á violencia nun partido de fútbol na Pobra do Caramiñal

A Comisión Galega de Control da Violencia sancionou con senllas multas de 150 euros a dous espectadores que foron denunciados pola Garda Civil nun campo de fútbol da Pobra do Caramiñal (A Coruña) por alentar aos asistentes a actitudes violentas.

Trátase dos dous primeiros expedientes sancionadores da historia da Comisión por faltas cualificadas como leves. Na reunión celebrada este xoves, o organismo estudou ademais outros 13 expedientes sobre os que tamén se abriron dilixencias.

No caso das dúas sancións, os feitos producíronse o 24 de novembro de 2018 no campo de fútbol de Cadreche na Pobra. Ademais da multa económica, aos sancionados prohíbeselles asistir ao recinto deportivo durante un mes.

Dos outros expedientes abertos na reunión previa da Comisión Galega séguense a realizar investigacións para resolvelos canto antes.

O secretario xeral para o Deporte, José Ramón Lete Lasa, como presidente da Comisión, defendeu a "responsabilidade na salvagarda dos valores esenciais no deporte".

"Hai unha radical incompatibilidade entre deporte e calquera forma de violencia, polo que debemos actuar con contundencia e con firmeza pero tamén desde o acougo e a proporcionalidade", expuxo.

MENSAXE DE "TOLERANCIA CERO" Á VIOLENCIA NO DEPORTE

Neste sentido, valorou a decisión da Comisión como "un fito moi importante" e advertiu de que o organismo "seguirá traballando día a día para que ningún suceso violento quede impune". "Debemos mandar unha mensaxe clara de tolerancia cero fronte a calquera conduta violenta no deporte", remarcou.

A Comisión está formada por membros da Secretaría Xeral para o Deporte e doutros departamentos da Administración Pública (Interior e Educación), das federacións deportivas galegas, das facultades de ensino universitario do deporte e do Colexio de Psicólogos de Galicia, así como por deportistas e xuíces.

NOVOS ASUNTOS

Na terceira reunión da Comisión estudáronse ademais outros trece expedientes novos, producidos nas últimas datas, dos que tamén se abriron dilixencias.

Os casos analizados correspóndense coa denuncia por lesións leves derivadas dunha agresión no partido de fútbol de primeira autonómica xuvenil Milladoiro-Bertamiráns e de cinco denuncias a cinco afeccionados por desobedecer á autoridade e provocar situacións de perigo para si mesmos e para as persoas que realizaban a proba do Rally de San Froilán.

Tamén se analizaron dúas denuncias a dúas persoas por infrinxir a Lei contra a violencia no Rally de SanFroilán; dúas denuncias á mesma persoa por perturbar a seguridade cidadá en espectáculos deportivos e por desobediencia ou resistencia á autoridade na mesma cita do Rally de San Froilán; a denuncia a un afeccionado por riscos no Rally de Noia e, por último, intentos de agresión ao árbitro das semifinais da Copa da Costa entre o Camariñas e o Cabana.