Indurain e Chiappucci volverán retarse no Gran Fondo Ézaro este domingo
Unhas 1.500 persoas participarán nesta cita que se celebra na Costa da Morte, na única fervenza da Europa continental que cae directamente ao mar.
- Indurain e Perico Delgado destacan a subida ao Ézaro como "o espectáculo ciclista máis importante de Galicia"
- A Costa da Morte, referente do ciclismo internacional esta fin de semana
Por Europa Press / Redacción | SANTIAGO DE COMPOSTELA | 06/07/2019 | Actualizada ás 19:59
Unhas 1.500 persoas participarán este domingo no Gran Fondo Ézaro, que se celebra na Costa da Morte, na única fervenza da Europa continental que cae directamente ao mar. Unha cita na que os dous grandes do ciclismo Miguel Indurain e Claudio Chiappucci volverán retarse máis de dúas décadas despois dos seus históricos enfrontamentos no Tour e o Xiro.
Ambos xa participaron fai catro anos nesta proba, a única en España dentro do calendario UCI Gran Fondo World Series. Ademais, competirán outras figuras do ciclismo como Pavel Tonkov ou o gañador do Tour Óscar Pereiro.
EME Sports, da que é responsable o ciclista galego Ezequiel Mosquera, é a empresa organizadora da proba. Impulsada polo Concello de Dumbría, pasará por estradas da Costa da Morte de municipios como Muxía, Muros, Cee, Carnota, ademais do propio Dumbría.
Tras a presentación do sábado --conta co apoio do Banco Santander e Rede Eléctrica--, o domingo será a quenda de ver rodar aos ciclistas por unha contorna paisaxística única que inclúe a subida do 'muro' do Ézaro, cun desnivel do 30% que fixo soado a Volta a España.
