Pontón anima o BNG a "fuxir dos localismos": "Buscan que non vexamos Galicia como unha nación"

Defende a importancia de facer política desde a oposición e afea ao PSOE, a Podemos e ao PP o seu "centralismo" que "discrimina" a Galicia.

Por Europa Press / Redacción | SANTIAGO DE COMPOSTELA | 07/07/2019 | Actualizada ás 12:44

Comparte esta noticia

A portavoz nacional do BNG, Ana Pontón, animou este domingo aos concelleiros do Bloque Nacionalista Galego a "fuxir dos estériles localismos" xa que, ao seu xuízo, "só buscan que non se vexa a Galicia como unha nación".

Así o sinalou Pontón nun encontro con responsables políticos locais do BNG, que reuniu en Santiago de Compostela a máis de 200 alcaldes e edís da organización nacionalista para "trazar liñas de actuación" comúns tras as eleccións do pasado 26 de maio.

Neste contexto, a líder do Bloque subliñou que o BNG "non é unha suma de organizacións locais", senón que é unha "organización nacional" que ten "un proxecto de país". "Os concellos son unha peza clave, pero fuxindo dos estériles localismos", indicou.

"O localismo só busca dividirnos. Só busca que non vexamos a Galicia como un conxunto, como unha nación. Usouse sempre polas forzas estatais para desdebuxar a nosa identidade como galegos e xogar a unha división interna que nos fai un enorme dano como país", lamentou Ana Pontón.

Desta forma, subliñou os resultados do BNG nos pasados comicios, situándose como a terceira forza política en Galicia, e destacou que os nacionalistas "son un referente a nivel de política municipal" xa que teñen un "proxecto transformador" para as vilas e cidades.

POLÍTICA DESDE A OPOSICIÓN

Ana Pontón tamén defendeu a importancia de facer política desde a oposición. "A paciencia é unha virtude revolucionaria, non podemos perdela. O traballo desde a oposición é moi importante e ben feito dá os seus froitos. A oposición serve para transmitir o noso discurso político", apostilou.

A portavoz nacionalista animou os concelleiros a "estar orgullosos do traballo feito", aínda que indicou que por diante hai un "reto fundamental" que son as eleccións autonómicas de 2020. Para ela, na actualidade "ninguén discute que o BNG é imprescindible" e unha "alternativa de futuro" para Galicia.

Segundo Pontón, "seguir ensanchando a corrente de simpatía" cara ao Bloque é a "clave" para "pór punto e final ao decenio negro" do presidente da Xunta, Alberto Núñez Feijóo. "Non chega con desaloxar a Feijóo da Xunta. O Goberno galego ten que estar liderado polo BNG. Somos a garantía dun cambio real e transformador. Ofrecemos aos galegos algo único, un proxecto de país, xenuíno, pensado desde Galicia", insistiu Ana Pontón.

CRÍTICAS Ás FORZAS "CENTRALISTAS"

Así, afeou ao PSOE, a Podemos e ao PP o seu "centralismo" que "empobrece" e "discrimina" a Galicia. "Estamos convencidos de que en Galicia hai recursos e capacidade suficiente para crear emprego de calidade e manter uns servizos públicos de primeira", asegurou Pontón.

Sobre a investidura do presidente do Goberno, lamentou a "frivolidade" e o "espectáculo" das forzas estatais e augurou que o debate de investidura será "frustrado". "Para que haxa cambio o BNG ten que liderar un novo ciclo político", sentenciou Pontón, tras pedir "implicación" na manifestación do 25 de xullo.

A portavoz nacional do BNG, Ana Pontón.. BNG
A portavoz nacional do BNG, Ana Pontón.. BNG | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Gougamallo

Por trás da maioría das candidaturas dises micropartidos municipais adoita haber egos feridos por non poder ir nas listas dos partidos "grandes" e por suposto interés polo carto. O localismo e un microcaciquismo de dereitas ou de esquerdas que por desgraza fai que concellos que podían ter bos gobernos fiquen nas mans do pp de turno... Ourense é o mellor exemplo. Pra min en Galiza só hai un concello e por elo voto sempre por él: Galiza.