Nova edición dos Xogos do Eixo Atlántico, o maior encontro deportivo da eurorrexión

Os Xogos do Eixo Atlántico, que se celebrarán ata o día 12, inaugúranse o vindeiro luns 8, en Braga. Xa van 24 anos impulsando o Deporte sen Fronteiras e nesta décimo terceira edición participarán 1.800 mozos e mozas inscritos en nove modalidades: balonmán, baloncesto, fútbol 7, voleibol, atletismo, atletismo adaptado, natación, natación adaptada e tenis. Ademais, contará coa participación de grupos etnográficos e actuacións musicais.

Os deportistas desfilarán polo centro da cidade onde estarán precedidos por grupos etnográficos: unha comitiva de romanos do Braccara Augusta abrirá o desfile. Seguirana intercalados entre as representacións as figuras de Xigantes e Cabezudos da Romaría de Nossa Sra da Agonía de Viana do Castelo, as caras de Bragança, e os gaiteiros da Deputación de Lugo.

 

Así será anunciado no acto de inauguración presidido polo alcalde de Braga, Ricardo Rio, o presidente do Eixo Atlántico, Alfredo Rodriguez, e o Secretario de Estado de Deportes de Portugal, João Paulo Rebelo.Tamén estarán presentes representantes políticos das 26 cidades participantes. Entre eles atópanse os alcaldes das cidades de Pontevedra, O Carballiño ou Sarria e os tenentes de alcalde e concelleiros das demais cidades participantes. Contará coa presenza do secretario xeral do Eixo Atlántico, Xoan Vázquez Mao e a do presidente do Grupo de Traballo de Deportes da entidade e vicepresidente da Câmara Municipal de Vila Nova de Gaia, Guilherme Aguiar, ademais de representantes políticos e sociais da rexión Norte e de Braga.

DEPORTE ADAPTADO

Como vén sendo habitual nos Xogos do Eixo Atlántico, esta edición tamén integra varias modalidades de deporte adaptado, coa participación de máis de 130 persoas, case o dobre que na anterior edición, en liña coa filosofía do Eixo Atlántico de eliminar barreiras e fomentar a participación de toda a mocidade. Ricardo Río, alcalde de Braga, reiterou o forte compromiso da cidade coa organización desta competición, que "se asume como unha oportunidade de aproximar os pobos, mostrar o talento da rapazada e a dinámica deportiva e asociativa dos municipios do Eixo Atlántico".

O ÚNICO EVENTO DEPORTIVO TRANSFRONTEIRIZO DE EUROPA 

Desde a súa orixe, en 1995, esta competición é unha das principais bandeiras do Eixo Atlántico e un factor de gran mobilización de deportistas. Os Xogos están dirixidos á promoción do deporte, á convivencia entre a mocidade e, tamén ao mellor coñecemento entre os cidadáns das dúas rexións. Realízanse de dous en dous anos e constitúen un evento deportivo transfronteirizo único en Europa. As dez cidades que participarán en Braga por Galicia son O Barco de Valdeorras, Monforte de Lemos, Santiago de Compostela, Lugo, Carballo, Sarria, Ourense, Vilagarcía, Vigo e O Carballiño. 

No trascurso do acto farase entrega do Trofeo "Jogo Limpo" Nelson Cardoso correspondente á anterior edición e que recaeu no municipio de Monforte de Lemos. Así mesmo, homenaxearase a Serafín Carballo, membro do Grupo temático de Deportes en representación do concello de Lugo. Cabalo foi atleta e nos últimos 16 anos ata a súa recente xubilación foi responsable de Deportes no concello de Lugo. O outro homenaxeado é Mário Manuel Silva, atleta portugués retirado especializado na proba de 1500 m, na que conseguiu ser medallista de bronce europeo en 1990.