Arcebispado e Concello buscarán que Santiago sexa a cidade "da cultura do encontro" no Ano Santo

Julián Barrio confirma que pediron expresamente ao Vaticano que o Papa visite a capital galega durante a celebración do Xacobeo.

Por Europa Press / Redacción | SANTIAGO DE COMPOSTELA | 10/07/2019 | Actualizada ás 18:00

Comparte esta noticia

O arcebispo de Santiago, monseñor Julián Barrio, expresou este mércores, tras manter unha reunión co alcalde compostelán, Xosé Sánchez Bugallo, que lle gustaría facer de Santiago a cidade "da cultura do encontro" na celebración do Ano Santo 2021.

Julián Barrio
Julián Barrio | Fonte: conferenciaepiscopal.es

Así o manifestou en declaracións aos medios tras o seu encontro co rexedor da capital galega, quen lle trasladou que colaborará "ao 100 por 100 de capacidade" de cara ao Xacobeo e valorou o "excelente" estado das relacións entre o Consistorio e a Igrexa.

Neste sentido, Barrio asegurou que o Arcebispado está a preparar "esa acollida relixiosa e espiritual aos peregrinos", á vez que é "consciente" de que necesitan tamén a "colaboración das institucións civís". "Unha colaboración que eu, sen dúbida, pido e agradezo" pensando "no ben común non só da cidade, senón tamén para Galicia e, atrévome a dicir, para toda España", proclamou o arcebispo.

Ademais, quixo agradecer que o alcalde compostelán volva participar nas actividades relixiosas --como delegado rexio-- do 25 de xullo, Día do Apóstolo. Neste sentido, insistiu en que é "a Casa Real a que convida" o rexedor a facer do seu representante.

"DESCOÑECEMENTO HISTÓRICO"

En referencia ao exalcalde da capital galega Martiño Noriega, quen rexeitaba acudir aos actos relixiosos do tamén Día de Galicia, Bugallo apuntou que é "descoñecemento histórico" vincular este evento co franquismo. "Cando naceu Franco, levaba 300 anos" celebrándose, aseverou.

"Hai que pensar con certa humildade. Durante 400 anos mantívose a tradición. Noriega, e eu mesmo tamén, somos unha parte moi pequena. (...) O alcalde ten que ser tamén alcalde de todos, pero tamén ten que ser alcalde da historia da cidade", advertiu o recentemente electo rexedor.

"PENSAR MÁIS ALÓ DO INMEDIATO"

Así mesmo, o arcebispo mostrouse "agradado" por que o alcalde fale "non soamente" do Ano Santo do 21, senón que "hai que pensar" nos do 27 e 32. "Un bo gobernante ten que pensar máis aló do inmediato", apostilou. Así as cousas, a preguntas dos xornalistas, monseñor Julián Barrio admitiu que "se fixo" unha petición expresa ao Vaticano para que o papa Francisco visite Santiago no Xacobeo.

"Non lles caiba dúbida que tanto ao alcalde coma min agradaríanos moitísimo que o Papa puidese vir durante o Ano Santo. Imos tentalo, faremos o esforzo que podamos, pero iso non é garantía de que este desexo se poida converter en realidade", relatou o arcebispo.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta