Detido por denunciar que dous homes "disfrazados de pitos amarelos" lle roubaran o móbil
A Policía comprobou que se tratou dunha falsa denuncia.
Por Europa Press / Redacción | OURENSE | 12/07/2019 | Actualizada ás 13:50
Axentes da Policía Nacional detiveron en Ourense a un mozo como presunto autor dunha simulación de delito ao denunciar o falso roubo do seu teléfono móbil por parte de dous individuos disfrazados de pitos amarelos.
Segundo informou a Policía Nacional, os feitos tiveron lugar o 12 de febreiro cando se personou en dependencias policiais un mozo para presentar denuncia polo supostamente ocorrido o día anterior ás 6,30 horas. Segundo manifestou, "dous individuos disfrazados de pitos amarelos ameazarono na vía pública, mentres un o suxeitaba por detrás, para quitarlle o seu teléfono móbil", valorado en 1.159 euros, relataron as mesmas fontes.
Axentes do Grupo de UDEV realizaron labores de investigación para o esclarecemento do feito delituoso e chegaron á conclusión de que "nunca lle subtraeron o teléfono e que continuaba utilizándoo", destaca a Policía.
Na mañá deste xoves 11 de xullo os policías mobilizados procederon á súa localización e detención, tras o que foi trasladado a dependencias policiais para continuar coas xestións. Os axentes localizáronlle o teléfono móbil entre a súa roupa ao realizarlle un cacheo superficial corporal.
O detido foi identificado como un mozo de 25 anos de idade natural de Ourense, ao que non lle constan antecedentes. Quedou en liberdade en dependencias policiais.
